Варшавадаги “Ford” ва “Suzuki” автосалонларида ёнғин чиқди
Бугун эрталаб Польша пойтахти Варшаванинг автомобилларга техник хизмат кўрсатиш маркази ҳамда бир нечта автомобил дилерлик марказларида йирик ёнғин содир бўлди. Бу ҳақда мамлакат фавқулодда хизматлари маълум қилди.
Ўлка давлат телерадиокомпанияси (TVP) хабарига кўра, ёнғин маҳаллий вақт билан соат 05:00 атрофида Варшаванинг Брудно туманидаги Краснобродзка кўчасида бошланган.
Гувоҳларнинг сўзларига кўра, ёнғин авж олган вақтда бир неча марта кучли портлаш овозлари эшитилган. Дастлабки тахминларга кўра, алангага автомобиллар ва ёнилғи бакларининг портлаши сабаб бўлган. Ёнғин тез суръатларда тарқалиб, тахминан 3 минг квадрат метр майдонни қамраб олган.
Польша давлат ёнғин хизмати томонидан тарқатилган видеолавҳаларда “Ford” ва “Suzuki” дилерлик марказлари аланга ичида қолганини кўриш мумкин.
Ҳодиса жойига 30 дан ортиқ ёнғин-қутқарув ходимлари жалб этилди. Улар орасида кимёвий хавфларга қарши ихтисослашган гуруҳлар, шунингдек, ёнғин кўламини баҳолаш учун дронлардан фойдаланувчи бўлинмалар ҳам бўлган.
Расмийлар маълум қилишича, ёнғин маҳаллий вақт билан соат 08:30 га келиб назорат остига олинган.
Таъкидланишича, ҳодиса оқибатида ҳалок бўлганлар ёки жароҳатланганлар йўқ. Ёнғиннинг келиб чиқиш сабаблари юзасидан тергов ишлари олиб борилмоқда.
Ў.Алимов, ЎзА
