ЕИ РФга қарши 21-санкция пакетини маъқуллади
Европа Иттифоқига аъзо давлатлар Россияга қарши 21-санкция пакети бўйича сиёсий келишувга эришди. Энди ҳужжат ЕИ Кенгаши томонидан расман тасдиқланиши кутиляпти.
Янги пакет энергетика, молия, криптовальюта ва ташқи савдо соҳасига нисбатан қўшимча чекловларни назарда тутади. Шунингдек, “яширин флот” таркибидаги кема ва улар фаолиятига кўмаклашаётган шахсларга қарши санкция кенгайтирилади.
Пакет доирасида Россия нефтига нисбатан амалдаги нарх чегарасини яна 12 ойга узайтириш, мамлакат суюлтирилган табиий газини учинчи давлатларга ташиш бўйича аввал тузилган шартномалар учун чекланган истисно қолдириш ҳамда ҳарбий саноат билан боғлиқ технология экспортини янада чеклаш кўзда тутилган.
Европа Кенгаши президенти Антониу Кошта РФга қарши босим ва Украинани қўллаб-қувватлаш сиёсати давом этаётганини таъкидлаган.
Д.Ҳакимов, ЎзА
