Футбол ва футзал байрамига тайёргарлик ишлари қизғин
Мамлакатимиз бўйлаб энг улуғ ва энг азиз байрамимиз — Мустақиллигимизнинг 35 йиллик шодиёналари кенг нишонланаётган айни кунларда пойтахтимизда футбол ва футзал мухлислари учун қатор йирик спорт тадбирлари ўтказилади.
Ҳусусан, 2 сентябрь куни соат 18:00 да «Ҳумо Арена»да футзал бўйича “Ўзбекистон Суперкубоги-2026” учрашуви бўлиб ўтади. Унда мамлакатнинг амалдаги чемпиони “BMB PFC” ҳамда Суперлига финалчиси “SQB PFC” жамоалари баҳс олиб боради.
Дарвоқе, мухлислар учун муҳим янгилик — Суперкубок учрашуви чипталари «Ҳумо Арена»нинг марказий кассаси ёнида вақтинча фаолият юритаётган Ўзбекистон футбол федерацияси кассасида бепул тарқатилмоқда.
Шунингдек, 3 сентябрь куни соат 18:00 да эса «Бунёдкор» стадионида «Жаҳон футболи афсоналари — Ўзбек футболи афсоналари» ўртоқлик учрашуви бўлиб ўтади.
Мазкур баҳсда Хулио Сезар, Марко Матерацци, Жером Боатенг, Мичел Сальгадо, Кристиан Заккардо, Эстебан Камбьяссо, Рикардо Куарежма, Уэсли Снейдер, Оскар, Кевин Кураньи ва Винченцо Яквинта каби машҳур футболчилар иштирок этиши кутилмоқда.
Айни дамда пойтахтда мазкур спорт тадбирларини юқори савияда ўтказиш учун тайёргарлик ишлари қизғин давом этмоқда.
Жавоҳир Тошхўжаев, ЎзА
