Зеленский уруш қишда ҳам давом этиши мумкинлигини айтди (+видео)
6 сентябрь, якшанба куни кечқурун Украина президенти Володимир Зеленский АҚШ президентининг махсус вакиллари Стивен Уиткофф ва Жаред Кушнер ҳамда Германия, Франция ва Буюк Британиянинг миллий хавфсизлик бўйича маслаҳатчилари иштирокидаги учрашув ҳақида маълумот берди. Бу ҳақда DWнашри хабар қилди.
Музокараларда Россия ва Украина ўртасидаги урушни тугатишнинг эҳтимолий шартлари, қисқа муддатда Ғарб давлатларининг Украинага ёрдами ва хавфсизлик кафолатлари муҳокама қилинган.
Зеленский уруш қишда ҳам давом этиши мумкин, деб айтди. Унинг таъкидлашича, Киев Ғарб давлатларидан қиш фасли учун алоҳида ёрдам пакетига муҳтож.
«Биз америкалик ҳамкорлар билан келишиш имконига эга бўлишимизга жуда умид қиляпмиз. Агар уруш қишда ҳам давом этса, Европа давлатларининг қўллаб-қувватлашига ишонамиз. Ҳозирча вазият шундай кўринаяпти»,— деди Украина раҳбари.
Унинг қўшимча қилишича, Киев АҚШдан суюлтирилган табиий газни катта ҳажмда олиш ва ундан фойдаланиш имкониятларига, шунингдек, ҳаво мудофааси соҳасида янги ёрдамга умид қилмоқда.
Маълумотларга қараганда, АҚШ вакиллари қиш келмасидан олдин тинчлик музокараларида жиддий натижага эришишни исташларини билдирган. Шунингдек, музокараларда ҳудуд масаласи ҳам муҳокама қилинган. Зеленскийнинг айтишича, ҳудуд масаласи ҳали ҳам долзарб бўлиб қолмоқда.
Бу икки АҚШ вакили урушни тинч йўл билан ҳал қилиш масаласи билан шуғуллана бошлаганидан бери Украинага биринчи марта ташриф буюрди.
Музокараларнинг биринчи босқичидан кейин журналистлар билан суҳбатда Жаред Кушнер АҚШ президенти Дональд Трамп урушни тугатиш, одамлар ўлимига чек қўйиш ва оилаларга енгиллик олиб келишга жуда қатъий ҳаракат қилмоқда, деди.
Бундан бир кун олдин Уиткофф ва Кушнер Москвада Россия президенти Владимир Путин билан музокара ўтказган эди. Оқ уй бу учрашувни мазмунли деб атаган. Кремль эса Украинадаги урушни тинч йўл билан ҳал қилиш бўйича вазият осон эмаслигини билдирган. Вашингтоннинг ушбу музокарачилари бунга қадар ҳам Россия пойтахти Москвага бир неча марта ташриф буюрган.
Кенжа Бекжонов, Искандар Исматов, ЎзА
