Жаҳон биржаларида ўсиш, нефть бозорида эса пасайиш кузатилди
Оқ уй раҳбари Дональд Трамп Россия-Украина ўртасида энергетика объектларига ҳужумларни тўхтатиш бўйича сулҳга эришилганини эълон қилгач, жаҳон бозорларида нефть нархи бироз пасайди, Осиё биржаларида эса акциялар қимматлашди.
Трампнинг “Truth Social” тармоғидаги баёнотига кўра, келишув дарҳол кучга кириши керак, бироқ Киев бу хабарни ҳайрат билан қарши олди ва қўшимча маълумот сўради. Владимир Зеленский мамлакат сулҳни қўллаб-қувватлашини, Россия ҳам унга амал қилиши муҳимлигини айтди.
Шу билан бирга, Украинадаги бир нечта электр станцияларига ҳужумлар уюштирилгани хабар қилинди. Нефть нархи эса дастлабки ўсишни ортга қайтариб, ҳар икки асосий хом нефть шартномаси бўйича 1 фоиздан кўпроқ арзонлашди.
Жаҳон бозорида Гонконг, Сидней, Сингапур, Веллингтон ва Манила биржалари ўсиш билан савдо қилди, АҚШ фонд бозоридаги муддатли шартномалар нархи ҳам ошди. Инвесторлар АҚШда инфляция ва чакана савдо бўйича янги маълумотлар эълон қилинишини, шунингдек, йирик банкларнинг молиявий ҳисоботларини кутмоқда. Бу кўрсаткичлар Федерал захира тизимининг фоиз ставкалари бўйича кейинги қарорларига таъсир қилиши мумкин.
Мусулмон Зиё, ЎзА
