Трамп Нобель қўмитаси қароридан норози
– Мен саккиз урушни ҳал қилдим, 2 тасини тугатиш ёки бартараф этишга яқинман, барча исроиллик асирлар, жумладан охирги 28 нафарини қайтардим, дунёнинг турли бурчакларида юзлаб гаровга олинганларни озод қилдим, Венесуэладаги урушда ғалаба қозондим, бу мамлакатни шафқатсизларча бошқарган диктаторни қўлга олдим ва террорнинг биринчи рақамли давлат ҳомийси Эрон Ислом Республикаси ядровий қуролга эга бўлишига тўсқинлик қилдим - ва яна бошқа кўп ишлар! Шунга қарамай, на мен, на Америка Қўшма Штатлари Нобель тинчлик мукофотига сазовор бўлмадик.Бу баёнотни АҚШ Президенти Дональд Трамп ижтимоий тармоқда ёзиб қолдирган. Шунингдек, у Тинчлик мукофоти Нави Пиллайга берилгани муносабати билан танқидий фикрини ҳам саҳифасига қайта жойлаштирди.
Етакчи америкалик адвокат Дэвид Шоэннинг “Нобель қўмитаси ўзини бутунлай шарманда қилди ва бир вақтлар буюк ҳисобланган тинчлик мукофотини БМТнинг Нави Пиллайига бериш орқали қадрсизлантирди” мазмунидаги фикрини ҳам жойлаштирди.
Хуллас, бу йил ҳам Нобель тинчлик мукофоти Трампга насиб этмади. Бу унвонга Жанубий Африкалик адвокат ва инсон ҳуқуқи фаоли Наванетем (Нави) Пиллай муносиб кўрилди. Норвегия Нобель қўмитаси унинг тинчлик ва халқаро ҳуқуқни тарғиб қилишдаги саъй-ҳаракатини юқори баҳолади.
– Пиллай Америка ва Исроилдан очиқча нафратланади, – деб ёзган эди адвокат Дэвид Шоен. – Ўз қараши билан у террорчиларни улуғлаб, ҲАМАС гуруҳини қўллаб-қувватлаган. Исроил томонидан содир этилган геноцидни аниқлагани тўғрисида даъво қилиб, ушбу мамлакатни жиноий жавобгарликка тортишга чақириб, сохта “тергов” ўтказди. Унинг бирор оддий соҳада обрўси йўқ, тинчликни тарғиб қилиш учун ҳеч нарса қилмаган. Аксинча…
Шон Трампнинг ютуқларини санаб ўтиб, унинг шарофати билан Авраам келишуви пайдо бўлгани, ўзи Россия – Украина урушини тугатиш, Эронни тўхтатиш ва Ғазо секторини тиклаш йўлида ҳаракат қилаётганини таъкидлаган.
2025 йил Венесуэла мухолифати етакчиси Мария Корина Мачадо Нобель тинчлик мукофотига сазовор бўлган. АҚШнинг Венесуэла Президенти Мадурони қўлга олиш амалиётидан кўп ўтмай, у мукофотни Президент Трампга топширди.
С.Раҳимов, ЎзА
