Өзбекстан мен АҚШ балалар контенті саласындағы ынтымақтастықты кеңейтеді
Өзбекстан мен Америка Құрама Штаттары түрлі салалардағы өзара ынтымақтастықты кезең-кезеңімен кеңейтіп, білім, мәдениет және шығармашылық индустриялар бағытындағы әріптестікті нығайтуға басымдық беріп келеді.
Осындай байланыстардың легі жас ұрпақтың шығармашылық әлеуетін дамытуға қатысты балалар контентін нығайтумен жалғасын тауып отыр. Осы бағытта халықаралық тәжірибені енгізу, мамандардың біліктілігін арттыру және шетелдік серіктестермен бірлескен жобаларды жүзеге асыруға басымдық берілуде.
АҚШ-тың Өзбекстандағы Төтенше және өкілетті елшісі Джонатан Хеник, Мәдениет министрінің бірінші орынбасары – Кинематография агенттігінің директоры Жахонгир Ахмедов және Балалар контентін дамыту орталығының атқарушы директоры Зафар Юлдашев кездесу өткізді.
Балалар контентін дамыту орталығының мәліметінше, кездесу барысында өзбекстандық жастар мен сала мамандарын анимация, кинематография, визуалды эффектілер, актерлік өнер және басқа да креативті бағыттар бойынша халықаралық білім беру бағдарламаларына тарту мәселелері талқыланды.
Сондай-ақ америкалық жетекші режиссерлердің, музыкалық продюсерлер мен сарапшылардың қатысуымен Өзбекстанда шеберлік сабақтарын, семинарлар және шығармашылық кездесулер ұйымдастыру мәселелері қарастырылды.
Тараптар «Fulbright» және басқа да академиялық алмасу бағдарламалары аясында сала мамандарының қатысуын кеңейтуге, сондай-ақ өзбекстандық балаларға арналған ағылшын тілін үйрететін заманауи білім беру контентін әзірлеп, оны ұлттық медиа кеңістікте кеңінен насихаттауға уағдаласты.
Кездесу соңында АҚШ-тың Өзбекстандағы Төтенше және өкілетті елшісі Джонатан Хеник балалар контентін дамытуға бағытталған бірлескен бастамаларды қолдауға және практикалық ынтымақтастықты жалғастыруға дайын екенін білдірді.
