Қытайлық ұйым өкілдері Өзбекстанның ұлттық қолөнерімен танысты
Өзбекстанның бай қолөнер дәстүрін халықаралық деңгейде таныту және мәдени байланыстарды кеңейту бағытындағы ынтымақтастық жаңа серпін алуда.
Осыған орай Ташкент қаласында Республикалық «Хунарманд» қауымдастығының төрағасы Р.Мирзаахмедов пен Қытай Халық Республикасының Шэньчжэнь қаласында қызмет ететін «Pocket Mount» ұйымының өкілдерімен кездесу өтті.
«Pocket Mount» – дәстүрлі қолөнерді, мәдени мұраны және орнықты дамуды қолдауға бағытталған жобалық ұйым. Ұйым Қытайдың Ханчжоу мен Шанхай секілді ірі мәдени-шығармашылық орталықтарымен ынтымақтаса отырып, Қытайда және өзге елдерде далалық зерттеулер, мәдени алмасу бағдарламалары мен дәстүрлі қолөнерді зерделеуге арналған жобаларды жүзеге асырады.
Кездесу барысында делегация жетекшісі Сюй Янг мен Чжуо Луқиао ханымдар ұйымның қызметі, Өзбекстандағы қолөнер шеберханаларына сапары кезінде алған әсерлері және алдағы ынтымақтастықтың келешегі жөнінде пікір алмасты.
Қонақтар Самарқанд пен Шахрисабз қалаларындағы қолөнер орталықтарымен жақын танысқанын, келесі сапарын Ферғана облысындағы шеберханаларда жалғастыруды жоспарлап отырғанын жеткізді.
Айта кетейік, «Pocket Mount» ұйымының өкілдері Ферғана облысының Марғилан қаласындағы «Қолөнершілер орталығында», Марғилан қолөнерді дамыту орталығында және «Ёдгорлик» кәсіпорнында болды. Олар жібек маталарды дайындау үдерісімен, дәстүрлі тоқымашылық технологияларымен және жергілікті шеберлердің ғасырлар бойы қалыптасқан тәжірибесімен танысты.
Сапар барысында ұлттық қолөнер мұрасын сақтау, оны халықаралық деңгейде кеңінен насихаттау, мәдени алмасуды дамыту және ынтымақтастықтың перспективалы бағыттары талқыланды.
Тараптар ұлттық қолөнерді әлемдік кеңістікте таныту, мәдени байланыстарды нығайту және бірлескен жобаларды жүзеге асыру мүмкіндіктері жөнінде пікір алмасты.
