Ёнилғи қимматлиги республикачилар мағлубиятига сабаб бўлиши мумкин
Бензин ва дизель ёнилғиси нархи кўтарилиши 3 ноябрга белгиланган АҚШ Конгресси сайлови олдидан Америкада норозиликни кучайтирди. Иқтисодий вазият Президент Дональд Трамп ва Республикачилар партиясига жиддий зарба бериши мумкин.
“The Guardian” томонидан 15 октябрда чоп этилган “Harris Poll” сўровига кўра, америкаликларнинг 67 фоизи ёнилғи ва озиқ-овқат нархини асосий ташвиш сифатида баҳолаган. Респондентларнинг тўртдан уч қисми рецессиядан қўрқади, 61 фоизи иқтисодиёт аллақачон инқирозда эканига ишонади.
Айни пайт мамлакатда йиллик инфляция тахминан 3,7 фоизга етган. Ажабланарлиси – АҚШ рекорд миқдорда нефть ишлаб чиқариб, экспорт қилаётган бўлса-да, ёнилғи қимматлиги сақланиб қолмоқда.
Польшанинг “Interia” нашри ҳолатни 28 февраль куни АҚШ ва Исроил ҳужуми туфайли бошланган Эрон билан можарога боғлаган. Ҳурмуз бўғози бўйлаб юк ташувига таҳдид, нефть инфратузилмасига қилинаётган ҳужумлар жаҳон энергия нархи ўзгаришига салбий таъсир кўрсатмоқда.
Таъкидланишича, Трамп қийин танловга дуч келган. Ёнилғи экспорти чекланиши дунё бозори ва Америка компанияларига зарар етказади. Россия билан дизель ёнилғиси етказиш бўйича келишув эса сайловдан олдин нархни сезиларли даражада тушириши эҳтимоли йироқ. Кундалик нарх-наводан норозилик давом этса, демократлар Конгресснинг ҳар икки палатасида кўпчилик ўринни қўлга киритиши мумкин. Натижада Президент фаолияти қийинлашиб, импичмент жараёнига йўл очилиши мумкин.
С.Раҳимов, ЎзА
