Ёмғир офатга айланди: Шри-Ланкада мактаблар ёпилди
Шри-Ланкада икки кундан буён тинимсиз ёғаётган кучли ёмғир мамлакатнинг марказий тоғли ҳудудларида кенг кўламли тошқин ва кўчкиларни келтириб чиқарди. Табиий офат оқибатида камида 5 киши ҳалок бўлди, 3 киши жароҳатланди, 2 фуқаро йўқолган. Тегишли вазирлик маълумотига кўра, энг оғир вазият чой етиштириладиган марказий вилоятларда кузатилмоқда. Хавф кучайгач, ушбу ҳудудлардаги мактабларда дарс вақтинча тўхтатилди.
Кўчки икки турар жойни бутунлай босиб қолгани инсонлар ўлимига сабаб бўлди. Табиий офат натижасида 129 уй зарар кўрган, қарийб 2 000 аҳоли хавфсиз ҳудудга кўчирилган. Қутқарув ишига армия ва ҳарбий-денгиз кучлари жалб этилди. Телевидение тасвирида ҳарбийлар сув босган уйларда қолиб кетган одамларни қутқараётгани, янги кўчки хавфи остида ҳам ишни давом эттираётгани акс этган.
Ёмғир оқими нафақат аҳоли манзиллари, балки транспорт инфратузилмасига ҳам жиддий зарар етказди. Йирик тошлар, лой оқими ва қулаган электр устунлари бир неча асосий автомобиль йўлларини тўсиб қўйган. Айрим ҳудудларда транспорт ҳаракати бутунлай издан чиққан. Ҳукумат қутқарув амалиёти билан бирга йўлларни очиш ва электр таъминотини тиклаш ишларини ҳам бошлаган.
Бу Шри-Ланка сўнгги ойларда дуч келган илк йирик табиий офат эмас. Мамлакат ҳамон ўтган йил ноябрда юз берган “Cyclone Ditwa” оқибатини бартараф этиш билан банд. Ўшанда қарийб 640 киши ҳалок бўлган, 2 миллион аҳоли жабрланган ва иқтисодиётга 4,1 миллиард доллар зарар етган. Мутахассислар муссон мавсуми давом этаётгани боис, янги тошқин ва кўчки хавфи ҳамон юқорилигидан огоҳлантирмоқда.
Мусулмон Зиё, ЎзА
