55 соатлик синов: поляк сузувчи Болтиқ денгизини кесиб ўтди
Поляк спортчиси Бартломей Кубковский Швециядан Польшагача бўлган 160 километрлик масофани сузиб ўтиб, Болтиқ денгизини якка ҳолда кесиб ўтган илк инсонга айланди. У жума куни йўлга чиқиб, 55 соат узлуксиз сузди ва Польша соҳилига етиб келди. Натижа расман тан олиниши учун спортчи қирғоққа ҳеч қандай ёрдамсиз мустақил чиққан, бутун йўл давомида қайиқдан фойдаланмаган. Айни талаб тўлиқ бажарилгани тасдиқланди.
Кубковскийнинг асосий рақиби масофа эмас, чарчоқ эди. Икки суткадан кўп у ухламасдан сувда ҳаракат қилди, баъзан диққатини жамлаш ва вазиятни англашда қийинчиликка дуч келди. Уни кузатиб борган жамоа хавфсизликни таъминлаб, йўналишни назорат қилди ҳамда белгиланган вақтда озиқ-овқат ва суюқлик етказиб турди. Соҳилга чиққач, спортчи ҳали эришган натижасини тўлиқ ҳис қила олмаётганини айтди.
Бу ғалаба бир неча йиллик меҳнат самарасидир. Кубковский илк бор шундай синовни 2022 йил бошлаган, аммо 115 километрдан кейин тўхташга мажбур бўлган. 2025 йил қарийб 159 километр масофани босиб ўтиб, Польша соҳилига 15 километр қолганда кучли толиқиш сабаб мусобақани тўхтатган. Бу гал эса йиллар давомидаги тажриба, пухта тайёргарлик ва чидам унга тарихий натижага эришиш имконини берди.
Спортчи ўз муваффақиятини “Cancer Fighters” хайрия жамғармаси фаолиятига бағишлади. Сузиш давомида хайрия акцияси ҳам ўтказилди. Кубковский аввалроқ 24 соатлик узлуксиз сузиш бўйича жаҳон рекордини ўрнатган, миллий ҳамда халқаро мусобақаларда кўплаб медалларни қўлга киритган. Айни пайт яна бир поляк спортчиси Каролина Шепаняк ҳам Болтиқ денгизини сузиб ўтишга уринди, бироқ 58 соатдан кейин соҳилга 40 километр қолганда сафарини тўхтатди. Мутахассислар мазкур денгизни якка ҳолда сузиб ўтишни узоқ масофали сузишдаги энг оғир синовлардан бири сифатида баҳоламоқда.
Мусулмон Зиё, ЎзА
