“Янги Ўзбекистон талабалари Олимпиадаси”га старт берилди (+видео)
“Олимпия шаҳарчаси”нинг замонавий спорт мажмуалари 5 июнь куни ҳаваскор спортчи талабаларга ўз қучоғини очди. Албатта ёшлар барча шароитларга эга маҳобатли спорт саройларида куч синашишларининг аҳамияти катта. Чунки, бу ерда мусобақларда иштирок этаётган ҳар бир ёш ўзини олимпиада қатнашчисидек ҳис қилади.
Финал босқичи баҳслари спортнинг 7 турини қамраб олиб, “Янги Ўзбекистон талабалари Олимпиадаси” дастурига мувофиқ, биринчи кун давомида волейбол, футбол, гандбол ва енгил атлетика бўйича баҳслар ташкил этилди. Шу билан бирга кейинги кунларда ёшлар спортнинг баскетбол, стол тенниси ва сузиш турлари бўйича ҳам куч синашади.
Гандбол бўйича дастлаб Наманган давлат университети Чирчиқ давлат педагогика университетига қарши майдонга тушган бўлса, кейинроқ Навоий давлат кончилик ва технологиялар университети ҳамда Термиз давлат университети жамоалари ўртасидаги баҳс қизғин давом этди.
Шунингдек, олимпиада доирасида енгил атлетика мусобақалари шиддатли ва муросасиз кечди. 100 метрга югуриш финал босқичида Термиз давлат университети талабаси Сардорбек Адамбоев 11.05 сония натижа билан ғолибликни қўлга киритган бўлса, аёллар ўртасида Интизор Шуҳратова 13.37 сонияда марра чизиғини кесиб ўтиб, рақибларига имкон қолдирмади.
Шунингдек, аёллар ва эркаклар ўртасида турли масофаларга узунликка сакраш, ядро улоқтириш баҳслари ҳам қизғин давом этмоқда. Барча беллашувлар олимпиада талаблари асосида ўтмоқда ва уларга тажрибали ҳакамлар жалб қилинган.
Биринчи кунда шунингдек Чирчиқ давлат педагогика университетида ҳам қизлар ўртасида волейбол мусобақалари бўлиб ўтди.
Тадбир ташкилотчиларининг таъкидлашича олимпиаданинг финал босқичи мусобақаларининг расмий очилиш маросими Олимпия шаҳарчасида тантанали, юқори даражада бўлиб ўтади.
<iframe width="640" height="420" src="https://www.youtube.com/embed/KgHgurdiu9c" title="“Yangi O‘zbekiston talabalari Olimpiadasi”ga start berildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов, Ойбек Давронов, Улуғбек Тўхтаев (видео), ЎзА
