WTA рейтингида теннисчиларимизнинг ўрни қандай?
Халқаро аёл теннисчилар ассоциацияси (WTA) профессионал теннисчиларнинг янгиланган ҳафталик рейтингини эълон қилди.
Уимблдон турнири якунлари асносида тузиб чиқилган янгиланган рейтингда Ўзбекистон шарафини ҳимоя қилаётган теннисчиларимизнинг уч нафари юқорилашга эришди.
Иккинчи рақамли ракетка устаси Мария Тимофеева 16 поғонага кўтарилиб, 79-ўринни банд этди. Биринчи рақамли теннисчи қизимиз Камилла Раҳимова 8 поғонага пастлаб, 78-ўринда кўриниш берди.
Полина Кудерметова 4, тўртинчи рақамли теннисчимиз Лайма Владсон 57 ўринга юқорилади.
Дунё теннисчиларининг Топ-10 талигида бир нечта ўзгаришлар кузатилди. Уимблдон-2026 ғолибаси чехиялик Линда Носкова 12-поғонадан 7-ўринга, финалда айнан ватандошига ютқазган Каролина Мухова 9-поғонадан 6-ўринга юқорилади. Америкалик Кори Гауфф 3 ўринга кўтарилган бўлса, польшалик Ига Свёнтек аксинча, 3-ўриндан 8-поғонага тушиб кетди.
Ҳозирда беларуслик Арина Соболенко рейтинг пешқадами бўлиб турибди. Иккинчи ўриндан жой олган қозоғистонлик Елена Рибакина деярли карвонбошига етиб олди. Бир поғонага юқорилаган америкалик Жессика Пегула дунёнинг учинчи ракетка устасига айланди.
Т. Рўзиев, ЎзА
