Дунё курашчилари Парижда Ўзбекистон Республикаси Президенти соврини учун беллашади

Франция пойтахти Парижда кураш бўйича Ўзбекистон Республикаси Президенти соврини учун ўтказиладиган анъанавий халқаро турнирда Халқаро кураш ассоциациясига аъзо мамлакатларнинг энг кучли спортчилари иштирок этиши кутилмоқда. Мусобақа низомига мувофиқ, турнирда ҳар бир миллий федерациядан икки нафардан эркак ва икки нафардан аёл спортчи иштирок этиши мумкин.

Турнир жорий йилнинг 17-19 июль кунлари ўтказилиб, унда эркаклар -90, +90 килограммда, курашчи хотин-қизлар -70, +70 кило оғирликда ғолиблик учун кураш олиб боради.

Парижнинг рамзи саналган Эйфел минораси ёнидаги спорт майдонида ўтадиган беллашувларнинг ғолиб ва совриндорлари нафақат рейтинг очколари, балки мукофот пуллари билан ҳам тақдирланади.

Хусусан, ҳар бир вазн тоифасида биринчи ўрин соҳибларига уч минг, иккинчи ўрин учун икки минг ва учинчи ўринни қўлга киритган спортчиларга минг евродан мукофот пуллари топширилади.

Мусобақалар доирасида миллий санъатимизнинг бетакрор жозибаси, маданий меросимизнинг нодир жиҳатларини ўзида ифода этган миллий ҳунармандчилик асарлари Париж аҳлига ҳамда ушбу қадимий шаҳарга ташриф буюрган сайёҳларга намойиш этилади.

Эслатиб ўтамиз, турнирнинг умумий мукофот жамғармаси 30 минг еврони ташкил этади.

Т. Рўзиев, ЎзА