Трамп: Урушдан кейин Украинанинг қиёфаси бошқача бўлади
АҚШ Президенти Дональд Трамп Россия – Украина низоси бартараф этилаётгани, уруш тугагандан кейин Украина ҳозиргидан бироз бошқача кўринишга эга бўлишини таъкидлади. Шунингдек, “Starlink” тизимида узилиш юз бергани ҳақидаги гапларга шубҳа билдирди. Бу ҳақда етакчи “CBS News” телеканалига интервьюсида маълум қилган.
Украинага Америка қуроли етказилиши мавзусига тўхталар экан, Трамп шундай деди:
– Байден даврида украинларга 350 миллиард доллар ва қурол-яроқ ажратилди, биз эса Киевга эса ҳеч нарса бермадик ва аслаҳани Европага узатдик. Кўҳна қитъа АҚШга пул тўлаяпти. Шу тариқа биз кетма-кет қурол-яроқ сотдик. Айтиш жоиз, Украинада ҳарбий қурилмалардан фойдаланишга жасорат топилди. Ахир, бу қуролларни ишлатиш учун жасорат керак. Украина ўзини кучли томон сифатида кўрсата олди.
Журналист “Украина уруш якунида эркин ва мустақил давлат бўлиб қолиши кутиляптими” дея қизиқди.
– Менимча, мақсадга эришамиз, фақат Украина бироз бошқача қиёфага эга бўлади, – деди Трамп.
Интервью давомида урушни тинч йўл билан ҳал қилишга тўсқинлик қилаётган муаммо нималиги ҳақида ҳам сўралди. Оқ уй раҳбари келишувга асосий тўсиқ сифатида Владимир Зеленский ва Владимир Путин ўртасидаги кучли адоватни кўрсатди.
Трампдан “Путинга кўпроқ ишонасизми ёки Зеленскийгами” деб ҳам сўрашди.
– Бу ҳақда гапиришни истамасдим, лекин иккаласи билан ҳам тил топиша оламан, – деди Америка раҳбари. – Менимча, бу уруш яқин орада тугайди. Тинчлик ўрнатилишига сабабчи бўладиган ягона инсон – мен.
Кенжа Бекжонов, Улуғбек Тўхтаев (видео), ЎзА
