Трамп: Ўзимизга ҳам ракета керак
АҚШ Президенти Дональд Трамп Украинага қўшимча ракета етказиб бериш масаласига изоҳ бериб, мамлакатнинг ўзи ҳам бундай қуролга эҳтиёж сезаётганини билдирди.
Оқ уйдаги брифингда Трамп Жо Байден маъмуриятини Киевга кўрсатилган ҳарбий ёрдам орқали АҚШ қурол-яроқ захирасини кескин камайтириб юборишда айблади. Унинг таъкидлашича, ҳозир бу захира қайта тикланмоқда.
Журналистларнинг “Украинага “Patriot” ҳаво ҳужумидан мудофаа тизими учун қўшимча ракета ва узоқ масофага мўлжалланган қуроллар ажратиладими?” деган саволига Трамп “Бизга ҳам ракеталар керак”, дея жавоб қайтарган.
Шунингдек, у АҚШ Қуролли кучлари етарли даражада қуроллангани, мавжуд айрим воситалар ўта замонавий бўлмаса-да, самарадорлиги юқори эканини таъкидлаган.
Аввалроқ Украина Президенти Владимир Зеленский Россиянинг навбатдаги ракета ҳужумидан сўнг мамлакат ҳаво мудофааси учун “Patriot” тизими – тутиб қолувчи қурилмаларга эҳтиёж юқорилигини маълум қилган эди.
Д.Ҳакимов, ЎзА
