Тошкент шаҳридаги энг яхши профилактика инспектори, терговчи, тезкор вакил ва эксперт-криминалист аниқланди
Тошкент шаҳар Ички ишлар бош бошқармасида ички ишлар органлари ходимлари ўртасида ўтказилаётган «Энг яхши профилактика инспектори», «Энг яхши терговчи», «Энг яхши тезкор вакил» ҳамда «Энг яхши эксперт-криминалист» кўрик-танловининг иккинчи босқичи ўтказилди.
Мазкур танлов ходимларнинг касбий маҳорати, хизмат фаолияти самарадорлиги ва амалий кўникмаларини баҳолаш, шунингдек, ўз касбига садоқат билан хизмат қилаётган ходимларни рағбатлантиришга қаратилган.
Танлов натижаларига кўра аниқланган ғолиблар пойтахт Ички ишлар бош бошқармаси бошлиғи, полковник Равшан Султонхўжаев томонидан диплом ҳамда пул мукофотлари билан тақдирланди.
«Энг яхши профилактика инспектори» йўналиши бўйича 1-ўрин Чилонзор тумани ички ишлар органлари фаолиятини мувофиқлаштириш бўлинмаси профилактика инспектори, катта лейтенант Фаррух Қурбонбоевга насиб этди.
“Энг яхши терговчи” йўналиши бўйича мутлақ ғолибликни Олмазор тумани ички ишлар органлари фаолиятини мувофиқлаштириш бўлинмаси тергов бўлими терговчиси, лейтенант Муяссар Очилова қўлга киритди.
«Энг яхши тезкор вакил» йўналиши бўйича Тошкент шаҳар Ички ишлар бош бошқармаси тезкор қидирув хизмати катта тезкор вакили капитан К. Олимжонов биринчи ўринни эгаллади.
«Энг яхши эксперт-криминалист» йўналиши бўйича 1-ўрин совриндори Тошкент шаҳар Ички ишлар бош бошқармаси Эксперт-криминалистика маркази эксперти лейтенант Дониёр Тўламатов бўлди.
Танловларда ғолибликни қўлга киритган ходимлар мусобақаларнинг Республика босқичига йўлланма олди.
Н.Абдураимова, ЎзА
