Торонтода Камилла ва Полина Ватанимиз шарафини ҳимоя қилмоқда
Канаданинг Торонто шаҳрида аёллар тенниси бўйича дунёдаги энг нуфузли мусобақалардан бири – «Omnium Banque Nationale» турнири ўтказилмоқда. WTA 1000 тоифасига кирувчи мусобақанинг соврин жамғармаси 7 миллион 433 минг 76 АҚШ долларини ташкил этаётир.
Қувонарлиси, бу галги мусобақада мамлакатимиз шарафини яккалик баҳсларида икки нафар теннисчимиз – Камилла Раҳимова ва Полина Кудерметова ҳимоя қилмоқда.
Полина Кудерметова турнирдаги иштирокини саралаш босқичидан бошлади. Теннисчимиз мазкур босқичда мезбонлар вакили Эйвери Александерни 6:4, 6:4 ҳисобида мағлуб этиб, асосий тўр йўлланмасини қўлга киритди.
Асосий тўрнинг биринчи даврасида Полина Кудерметова нейтрал мақомда иштирок этаётган Алина Корнеевага қарши кортга чиқади.
Мамлакатимизнинг биринчи рақамли теннисчиси Камилла Раҳимова эса мусобақадаги иштирокини бир вақтлар жаҳон теннисининг етакчиларидан бири бўлган, етти карра «Катта дубулға» турнирлари ғолиби, америкалик тажрибали теннисчи Винус Уильямсга қарши баҳс билан бошлайди.
Торонтодаги нуфузли турнир ўзбекистонлик теннисчилар учун нафақат катта рейтинг очколари, балки мавсумнинг энг йирик мусобақалари олдидан муҳим синов вазифасини ҳам ўтайди.
Жавоҳир Тошхўжаев, ЎзА
