Суперлига: чемпионлик пойгаси тобора қизимоқда – ҳар бир очко олтинга тенг
Ўзбекистон Суперлигасида иккинчи давра баҳслари тобора қизғин тус олмоқда. 15-турнинг дастлабки учрашувлари чемпионлик пойгаси ва турнир жадвалидаги рақобат янада кескинлашаётганини яна бир бор намоён этди.
Хусусан, Бухорода мезбонлар ўз мухлислари олдида муҳим ғалабага эришган бўлса, Андижонда турнинг марказий учрашувида ғолиб номи аниқланмади. Натижада турнир жадвалидаги кураш янада кескин тус олди.
«Бухоро» ўз майдонида «Локомотив»ни 2:1 ҳисобида мағлуб этиб, муҳим уч очкони қўлга киритди. Учрашув тақдири атиги бир неча дақиқа ичида ҳал бўлди. Аввал Александр Шушняр ҳисобни очган бўлса, ортидан Шодиёр Шодибоев мезбонлар устунлигини икки голга етказди. Биринчи бўлим сўнггида Тимур Мамасидиқов ҳисобни қисқартирганига қарамай, иккинчи таймда бухороликлар ғалабани сақлаб қолишга муваффақ бўлди.
Андижондаги баҳс эса турнинг энг муросасиз учрашувларидан бирига айланди. «Пахтакор» меҳмон сифатида «Андижон»га қарши майдонга тушди. Ҳар икки жамоа ғалаба учун ҳаракат қилган бўлса-да, ҳужумчилар яратилган имкониятлардан унумли фойдалана олмади. Натижада «Бобур Арена»даги тўқнашув 0:0 ҳисобида якунланди. Бу натижа биринчи навбатда чемпионлик пойгасидаги рақобатни янада кучайтирди.
15-тур баҳслари бугун ҳам давом этади. Наманганда узоқ танаффусдан кейин «Навбаҳор» ўз мухлислари қаршисида майдонга қайтади. Водий жамоаси «Хоразм»ни қабул қилар экан, наманганлик мухлислар жамоадан фақат ғалабани кутаётгани шубҳасиз.
Турнинг яна бир диққатга сазовор баҳси Ғузорда бўлиб ўтади. Унда Муборакнинг «Машъал» жамоаси Жиззахнинг «Сўғдиёна»си билан куч синашади. Бу жамоалар ўртасидаги рақобат Суперлиганинг анъанавий қарама-қаршиликларидан бири ҳисобланади.
Статистика ҳам бу фикрни тасдиқлайди. Рақиблар шу кунгача миллий чемпионат доирасида 33 марта ўзаро баҳс олиб борган. Шуларнинг 14 тасида «Машъал», 9 тасида «Сўғдиёна» ғалаба қозонган, яна 10 учрашувда кучлар тенг келган. Голлар нисбати ҳам муборакликлар фойдасига — 42:33. Очколар ҳисобида эса «Машъал» 52, «Сўғдиёна» 37 очкога эга.
Тарихга назар ташланса, ўзаро баҳслардаги энг йирик ғалаба ҳам «Машъал» ҳисобига тўғри келади — 5:1. Жиззахликларнинг энг ишончли ғалабаси эса 3:0 ҳисобида қайд этилган. Бироқ футбол тарихи кўп бор исботлаганидек, статистика майдонда ҳал қилувчи омил эмас. Ҳар бир янги учрашув янги тарих ёзади.
15-турнинг навбатдаги баҳслари якунлангач, чемпионлик учун кураш олиб бораётган жамоаларнинг имкониятлари янада ойдинлашади. Шу билан бирга, турнир жадвалининг қуйи қисмидаги рақобат ҳам қизғин тус олмоқда. Демак, Суперлиганинг ҳар бир тури мамлакат футболи мухлислари учун янги интрига ва янги драматик воқеаларни тақдим этишда давом этмоқда.
Жавоҳир Тошхўжаев, ЎзА
