Тиббиётда чегара билмайдиган ҳамкорлик
Инсон ҳаёти — дунёдаги энг олий қадрият. Айниқса, шошилинч тиббий ёрдамга эҳтиёж туғилган бир неча дақиқа бемор тақдирида ҳал қилувчи аҳамият касб этиши мумкин. Бундай вазиятда тиббиёт ходимининг билими, замонавий технология, тезкор қарор ва пухта йўлга қўйилган ҳамкорлик тизими бир бутун механизм сифатида ишлаши керак.
Бугун мамлакатимизда тиббиётни модернизация қилиш, аҳолига кўрсатилаётган тиббий хизмат сифатини ошириш, замонавий диагностика ва даволаш усулларини амалиётга кенг жорий этиш баробарида хорижий давлатлар билан соҳавий ҳамкорликни мустаҳкамлашга ҳам алоҳида эътибор қаратилмоқда.
Давлат раҳбари ташаббуси билан соғлиқни сақлаш тизимида халқаро тажрибани ўрганиш, илғор тиббий технологияларни жалб этиш, мутахассислар малакасини ошириш ва инсон саломатлигига хизмат қиладиган замонавий тиббий муҳитни шакллантириш борасида кенг кўламли ишлар амалга оширилмоқда. Бухорода бўлиб ўтган навбатдаги муҳим мулоқот ана шу жараённинг амалий ифодаси бўлди.
Исроил Давлатининг Ўзбекистондаги элчиси ўринбосари Тамар Вейлер амалий ташриф билан Бухоро вилоятида бўлиб, Республика шошилинч тиббий ёрдам илмий марказининг Бухоро филиали фаолияти билан яқиндан танишди.
Меҳмонга филиал директори Ш. Ҳайдаров ҳамроҳлик қилиб, муассасанинг имкониятлари, тиббий хизмат кўрсатиш йўналишлари, шифокорлар ва тиббиёт ходимлари учун яратилган шароитлар, шунингдек, замонавий тиббий ёндашувларни амалиётга татбиқ этиш борасида амалга оширилаётган ишлар ҳақида маълумот берди.
Ташриф доирасида филиал раҳбарияти билан мулоқот ўтказилиб, шошилинч тиббий ёрдам соҳасида Ўзбекистон ва Исроил ўртасидаги амалий ҳамкорликни ривожлантириш истиқболлари муҳокама қилинди. Бу ерда эътиборга молик жиҳат шундаки, ҳамкорлик масаласи умумий мулоқот билан чекланиб қолмади. Хусусан, Бухоро вилоятига ташриф буюрадиган Исроил фуқаролари шошилинч тиббий ёрдамга муҳтож бўлган ҳолатларда уларга тезкор, сифатли ва малакали тиббий хизмат кўрсатиш бўйича ўзаро ҳамкорлик механизмларини йўлга қўйиш масаласи ҳам муҳокама этилди.
Тиббиётда ҳамкорликнинг ҳақиқий қиймати унинг қоғоздаги келишувларида эмас, балки инсон ҳаёти учун оғир дақиқаларда қандай натижа беришида намоён бўлади. Айниқса, Бухоро каби сайёҳлик салоҳияти юқори, ҳар йили кўплаб хорижий меҳмонларни қабул қиладиган ҳудуд учун шошилинч тиббий ёрдам тизимининг халқаро стандартларга мослиги муҳим аҳамиятга эга. Хорижлик меҳмон ўзини бегона юртда эмас, балки тиббий ёрдам зарур бўлган пайтда унга ишончли кўмак кўрсата оладиган муҳитда ҳис қилиши керак. Шу нуқтаи назардан қараганда, Исроил фуқароларига шошилинч тиббий ёрдам кўрсатиш бўйича ҳамкорликни йўлга қўйиш ташаббуси икки томонлама муносабатларнинг инсонпарварлик мазмунини янада бойитади.
Ташриф давомида Тамар Вейлер филиалнинг Ангиография бўлими фаолияти билан ҳам танишди. Бу ерда мутахассислар томонидан замонавий диагностика ва даволаш усулларидан фойдаланилаётгани, тиббий хизматларни такомиллаштириш ва беморларга юқори сифатли ёрдам кўрсатиш бўйича амалга оширилаётган ишлар ҳақида маълумот берилди. Замонавий тиббиётда диагностика қанчалик аниқ бўлса, даволаш тактикаси ҳам шунчалик самарали танланади. Айниқса, шошилинч ҳолатларда вақтни бой бермаслик, бемор ҳолатини тез ва аниқ баҳолаш, зарур тиббий ёрдамни ўз вақтида кўрсатиш ҳал қилувчи аҳамият касб этади. Шу маънода, Бухоро филиалида замонавий тиббий технологияларнинг амалиётга кириб келаётгани ҳудуд тиббиёти учун муҳим аҳамиятга эга.
Бугун тиббиётда янги қурилма ёки замонавий технологиянинг ўзи етарли эмас. Уни тўғри ишлата оладиган малакали мутахассис, тезкор қарор қабул қиладиган жамоа, аниқ ҳаракат алгоритми ва бемор манфаатини биринчи ўринга қўядиган тиббий маданият ҳам зарур. Шу боис мамлакатимизда тиббий муассасаларнинг моддий-техник базасини мустаҳкамлаш билан бирга, тиббиёт ходимларининг билим ва малакасини ошириш, халқаро тажрибани ўрганиш ва илғор усулларни маҳаллий амалиётга мослаштиришга катта аҳамият берилмоқда. Ўзбекистон ва Исроил ўртасидаги тиббий мулоқотлар ҳам ана шу мақсадга хизмат қилиши мумкин. Чунки тажриба алмашинуви — бу шунчаки билим алмашиш эмас. Бу кўп ҳолларда бир беморга ўз вақтида ёрдам бериш, бир инсон ҳаётини асраб қолиш, бир оиланинг тақдирини ўзгартириш демакдир.
Ташриф якунида шошилинч тиббий ёрдам соҳасида ўзаро ҳамкорликни янада ривожлантириш ва амалий алоқаларни мустаҳкамлаш бўйича келишувларга эришилди. Энг муҳими, бу мулоқот Бухоро тиббиётининг халқаро ҳамкорлик доираси кенгайиб бораётганини кўрсатади. Бугун дунё тиббиётида эришилаётган ютуқларни ҳудудларга олиб кириш, илғор технологиялардан самарали фойдаланиш ва тиббий хизмат сифатини халқаро талаблар даражасига кўтариш — давр талабидир. Бухорода эса бу жараён тобора амалий мазмун касб этмоқда.
Зариф Комилов, ЎзА мухбири
