"Сўғдиёна" нинг Ғузордаги ғалабаси

Ғузор шаҳрида бўлиб ўтган Ўзбекистон Суперлигаси биринчи даврасининг 15-туридан ўрин олган баҳсда Жиззахнинг “Сўғдиёна” жамоаси меҳмонда Муборакнинг “Машъал” клубини 3:1 ҳисобида мағлуб этди. Учрашув қаҳрамонига айланган Люпчо Дориев учта голга муаллифлик қилди.

Қашқадарё вилоятининг Ғузор шаҳрида ўтказилган баҳс ҳар икки жамоа учун ҳам муҳим аҳамият касб этар эди. Кетма-кет икки мағлубиятдан кейин майдонга тушган “Сўғдиёна” илк дақиқаларданоқ ташаббусни ўз қўлига олди ва 5-дақиқада Люпчо Дориев ҳисобни очди.

Жиззахликлар биринчи бўлимда ўйин тизгинини қўлдан чиқармади. Танаффусдан кейин эса меҳмонлар босимни янада кучайтирди. Аввал 47-дақиқада Забиҳилло Ўринбоевга нисбатан қоида бузилганидан кейин белгиланган пенальтини Люпчо Дориев аниқ амалга ошириб, мавсумдаги 10-голини урди. Орадан кўп ўтмай, 60-дақиқада ҳам у тезкор ҳужумни самарали якунлаб, хет-трикни расмийлаштирди.

Мезбонлар ҳисобни қисқартиришга уринди. 69-дақиқада муборакликларнинг киритилган голи ВАР аралашувидан кейин бекор қилинди. Бироқ қўшимча вақтнинг учинчи дақиқасида Азизбек Чориев узоқ масофадан йўллаган чиройли зарбаси билан “Машъал”нинг ягона голини уришга мувоффақ бўлди. Майдон эгаларининг бошқа гол киритишига вақти ҳам, имконияти ҳам бўлмади. “Машъал” – “Сўғдиёна” ўйинидаги якуний ҳисоб – 1:3, меҳмонларнинг фойдасига ҳал бўлди.

Баҳсдан кейинги матбуот анжуманида “Сўғдиёна” бош мураббийси Улуғбек Бақоев жамоаси ўйинни режа асосида ўтказганини таъкидлади. Унинг сўзларига кўра, эрта урилган гол футболчиларга ишонч бағишлаган, биринчи бўлимда ўйин тўлиқ назорат қилинган, иккинчи бўлимда эса яратилган имкониятлар самарали якунланган.

Мураббий “Машъал”нинг ўйини олдиндан чуқур таҳлил қилинганини, айниқса рақибнинг қарши ҳужумларда ва қанотларда тез ҳаракат қилиш хусусияти ҳисобга олинганини қайд этди. Шунингдек, кетма-кет икки мағлубиятдан кейин қўлга киритилган ушбу ғалаба футболчиларнинг руҳий ҳолати ҳамда жамоанинг турнир жадвалидаги ўрни учун муҳим аҳамият касб этишини таъкидлади.

Улуғбек Бақоев учрашув давомида “Машъал”нинг голи олдидан тўп рақиб футболчисининг қўлига теккан деган қарашда бўлгани учун ён ҳакамга эътироз билдирганини изоҳлади. Унинг фикрича, мазкур вазиятда ўйин тўхтатилиши лозим эди.

Ёш футболчиларга имконият бериш масаласига тўхталган мутахассис ҳар бир футболчи, аввало, ўз салоҳиятини исботлаши зарурлигини таъкидлади. Унинг қайд этишича, ўйин тақдирига таъсир қилиши мумкин бўлган ҳар бир вазият катта масъулият талаб қилади ва шу боис футболчиларга имконият босқичма-босқич берилади.

Матбуот анжуманида Люпчо Дориев ҳақида ҳам алоҳида фикр билдирилди. Бош мураббий яқинда легионер ҳужумчининг шартномаси узайтирилганини маълум қилди ҳамда унинг маҳорати, меҳнатсеварлиги ва майдондаги фидойилиги жамоадаги ёш футболчилар учун ибрат бўлаётганини таъкидлади. Унинг фикрича, Дориев нафақат голлари, балки етакчилик фазилатлари билан ҳам “Сўғдиёна”нинг муваффақиятига муносиб ҳисса қўшмоқда.

Бугун Суперлигада биринчи давранинг сўнгги – 15 -тур учрашувлари бўлиб ўтади.

Абдужалол Қаюмов, ЎзА мухбири