Шахмат: Синдоров жамоаси бугун Непомняший жамоаси билан куч синашади
Бугун, 6 сентябрь куни Ҳиндистоннинг Бангалор шаҳрида жамоалар ўртасида давом этаётган Tech Mahindra Global Chess League” турнирининг навбатдаги босқичида Жавоҳир Синдоров етакчилигидаги “FYERS American Gambits” жамоаси Ян Непомняший етакчилигидаги “Ganges Grandmasters” жамоаси билан куч синашади.
Глобал шахмат лигаси тизимидаги мазкур мусобақанинг кеча ўтказилган иккита ўйинда Синдоров жамоаси ғалабага эришди.
Дастлабки ўйинда Жавоҳир Синдоров, Бибисара Ассаубаева, Нихал Сарин, Даниил Дубов, Сара Хадем ва жамоа менежери Марк'Андрия Мауриццинидан иборат “FYERS American Gambits” жамоаси собиқ жаҳон чемпиони Вишванатан Ананд сардорлигидаги “PBG Alaskan Knights” жамоасини 10:4 ҳисобида мағлуб этган бўлса, иккинчи ўйинда Алиреза Фирузжа сардорлигидаги “Triveni Continental Kings” шахматчиларини 14:5 кўринишида доғда қолдирди.
Айтиш лозимки, ортда қолган учрашувларда Жавоҳир Синдоров аввалига Вишванатан Анандни 3:0 ҳисобида енгди. Кейинги учрашувда Алиреза Фирузжа билан 1:1 ҳисобида дурангга эришди.
Бугун ўтказиладиган баҳслар остонасида Синдоров жамоаси 6 та жамоа орасида 24 очко билан етакчилик қилмоқда. Кейинги ўринлардан жой олган Магнус Карлсен сардорлигидаги "Alpine APL Pipers” ва Ян Непомняший етакчилигидаги “Ganges Grandmasters” жамоалари ҳисобида 10 очкодан мавжуд.
Умумий мукофот жамғармаси 1 миллион АҚШ долларидан иборат мазкур турнир 12 сентябрга қадар давом этади.
Т.Рўзиев, ЎзА
