Россия ва Украина ўт очишни тўхтатиш бўйича баёнот берди
Россия Мудофаа вазирлиги 8–9 май кунлари, Москвада Ғалаба куни нишонланадиган вақтда, Украина билан бир томонлама ўт очишни тўхтатиш режасини эълон қилди ва агар Украина буни бузса, Киевга “кенг кўламли ракета зарбаси” берилиши билан таҳдид қилди, деб хабар берди Euronews.
Россия президенти Владимир Путин бу таклифни ўтган ҳафта АҚШ президенти Дональд Трамп билан телефон суҳбати чоғида илгари сурган эди.
“Россия Федерацияси Қуролли кучлари Олий бош қўмондони В. Путин қарорига мувофиқ, 2026 йил 8–9 май кунлари ўт очишни тўхтатиш эълон қилинади... Украина томони ҳам шуни қўллаб-қувватлайди, деб умид қиламиз”, — дейилади Россия Мудофаа вазирлигининг баёнотида.
“Агар Киев Ғалаба кунининг 81 йиллигини нишонлашни бузиш мақсадида ўз жиноий режаларини амалга оширишга уринса, Россия Қуролли кучлари Киев марказига жавоб тариқасида кенг кўламли ракета зарбаси беради. Биз Киевнинг тинч аҳолиси ва хорижий дипломатик ваколатхоналар ходимларини шаҳарни ўз вақтида тарк этишга чақирамиз”, — дейилади баёнотда.
Душанба оқшомида Украина президенти Володимир Зеленский “тинчлик режими” жорий этилишини маълум қилди ва инсон ҳаёти ҳар қандай байрамдан кўра устун эканини таъкидлади.
“Биз 5 майдан 6 майга ўтар кечасидан бошлаб ўт очишни тўхтатишни эълон қиламиз. Россия раҳбарияти урушни тугатиш бўйича реал қадамлар ташлаши керак. Агар Россия Мудофаа вазирлиги Украина розилигисиз Москвада парад ўтказиб бўлмайди деб ҳисобласа, бу вазиятдан чиқиш йўлларини ҳам ўзлари топиши керак”, — деди Зеленский.
Ўтган ҳафта Россия Мудофаа вазирлиги бу йилги ҳарбий парадда оғир ҳарбий техника иштирок этмаслигини маълум қилди. Буни Украина дронларининг эҳтимолий ҳужум қилиши билан боғлашди.
АҚШ бошчилигидаги Россия-Украина тинчлик музокаралари Эрондаги уруш сабаб иккинчи даражага тушиб қолди. Охирги ҳафталарда ҳаво ҳужумлари яна кучайгани қайд этилмоқда.
<iframe width="560" height="315" src="https://www.youtube.com/embed/nHzcuxQK8Z4?si=U5hp2COCPNB-bhQv" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
