«Пул керакми?»: Телеграм каналидаги ёлғон эълонлар орқали фуқаролар номига кредит олинган
Телеграмдаги «Пул керакми?» канали орқали фуқароларга 250 минг сўмдан 2 миллион сўмгача пул берилиши ҳақида ёлғон ваъдалар берган шахс қўлга олинди.
Аниқланишича, 2003 йилда Қораўзак туманида туғилган А исмли шахс телеграмда «Пул керакми?» номли канал очиб, унга 258 нафар фойдаланувчини жалб қилган. Каналда 18 ёшдан ошган йигит-қизларга маълум миқдорда пул тарқатилиши ҳақида ёлғон эълон жойлаштирилган.
Мазкур эълонга ишонган фуқаролардан бири фирибгарлар билан телеграм орқали боғланган. Унга пул олиш учун Korona иловасини ўрнатиш, шахсий маълумотларини киритиш ва СМС орқали юборилган тасдиқлаш кодини айтиш кераклиги тушунтирилган. Шундан сўнг фуқаронинг шахсий маълумотлари ва СМС кодидан фойдаланилиб, унинг номига кредит расмийлаштирилган.
Кредит маблағлари эса фирибгарнинг банк картасига ўтказиб олинган. Алданганини англаган фуқаро пулларини қайтаришга уринган. Бироқ, бу сафар ҳам фирибгарнинг бошқа телеграм аккаунтига дуч келган. Унга номига расмийлаштирилган кредитни ҳақ эвазига ўчириб бериш ваъда қилинган. Натижада фуқаро яна 1 миллион 250 минг сўмни фирибгарнинг картасига ўтказиб берган.
Жиноий ҳаракатларини давом эттирган А исмли шахс бошқа бир фуқаро — Г исмли шахсни ҳам Korona иловаси орқали пул чиқариб бериш ваъдаси билан алдаган. Натижада унинг акаси номига 1 миллион сўмлик кредит расмийлаштириб, маблағни узиниг шахсий банк картасига ўтказган
У тергов жараёнида фуқароларга Korona иловаси орқали кредит расмийлаштириш учун телефон рақами, банк картаси маълумотлари ҳамда СМС кодларини тақдим этишни айтганини, кейинчалик олинган маблағларни ўз эҳтиёжларига сарфлаганини тан олган.
Мазкур ҳолат юзасидан тегишли органлар томонидан тергов ҳаракатлари олиб борилмоқда.
Ҳамроз Баёнов,
ЎзА
