Президент химия өнеркәсібін дамыту жолындағы перспективалы жобалармен танысты
Өнеркәсіпті жаңғырту, жоғары қосылған құнға ие өнімдер өндіру және экспорт әлеуетін арттыру – экономиканы дамытудың басым бағыттарының біріне айналып отыр.
Осыған орай құрылған «Шыршық» химия-индустриялық технопаркі бүгінгі таңда саладағы жаңа буын өнеркәсіп алаңдарының бірі ретінде қалыптасты.
Мемлекет басшысының 2022 жылғы 3 ақпандағы тиісті қаулысы аясында салынған бұл технопарк химиялық өнімдерді терең өңдеу, озық технологияларды енгізу және жергілікті әрі шетелдік инвесторлар үшін қолайлы жағдай жасау мақсатына қызмет етеді. Жалпы аумағы 26,4 гектар болатын аумақта инженерлік-коммуникациялық желілер мен заманауи инфрақұрылымды қалыптастыруға 25 миллион доллар жұмсалған.
Технопарктің инвестициялық тартымдылығы нақты көрсеткіштермен айқын көрініс тауып отыр. Атап айтқанда, 2025 жылы 56 миллион доллар инвестиция игеріліп, 758 жаңа жұмыс орны ашылды. Жыл бойы кәсіпорындар 60 миллион долларлық, 150-ден астам түрлі өнім өндірді.
Алдағы жоспарлар да ауқымды. 2030 жылға дейін инвестиция көлемін 207 миллион долларға, тауар өндірісін 294 миллион долларға, экспортты 48 миллион долларға жеткізу және жұмыс орындарын 2 300-ге дейін арттыру көзделіп отыр.
Осы жерде Президент Шавкат Мирзиёевке технопарк қызметі, сондай-ақ химия өнеркәсібін дамытуға бағытталған ғылыми-тәжірибелік жобалар таныстырылды.
Бүгінгі таңда минералды тыңайтқыштар өндірісі аграрлық сектор тұрақтылығын қамтамасыз етуде маңызды рөл атқарады. Жылына 3,7 миллион тонна тыңайтқыш өндірілгенімен, импортталатын фосфорлы және суда еритін тыңайтқыштарға сұраныс саланы одан әрі жаңғыртуды талап етеді. Осы бағытта 2,8 миллиард долларлық инвестициялық жобалар әзірленген.
Мұнай-химия саласында да ішкі нарықта полимерлерге деген сұраныс артып келеді. 2032 жылға қарай бұл қажеттілік 3,2 миллион тоннаға жетеді деген болжам бар. Ангренде «Көмірден олефин алу» және Қоңыратта «Нафтаны қайта өңдеу» сияқты ірі жобалардың іске асырылуы осы сұранысты толық қамтамасыз етіп, импортты алмастыруға мүмкіндік береді.
Тұрмыстық химия саласында да жүйелі жұмыстар жүргізілуде. Инвестициялық жобалар арқылы импорт көлемін екі есе қысқарту, ішкі тұтынуды жергілікті өнімдер есебінен 64 пайызға дейін жеткізу және экспорт көрсеткіштерін арттыру жоспарланған.
