Ўзбекистонлик пилотлар Қозоғистон чемпионатида муваффақиятли иштирок этди

Қозоғистоннинг “Sokol Karting” мажмуасида картинг бўйича халқаро класслар ўртасидаги Қозоғистон чемпионатининг 2026 йилги учинчи босқич баҳслари бўлиб ўтди.

Мусобақада Ўзбекистон ва Қозоғистоннинг иқтидорли пилотлари ғолиблик учун кураш олиб борди. Қувонарлиси, ҳамюртларимиз бир қатор совринли ўринларни эгаллаб, мамлакатимиз картинг мактабининг салоҳиятини яна бир бор намоён этди.

OK-J классида ғолиблик қозоғистонлик Артём Петрийга насиб этган бўлса, иккинчи ўринни Руслан Логинов эгаллади. Ўзбекистон вакили Владислав Ким учинчи натижани қайд этиб, бронза медали соҳиби бўлди. Шунингдек, Арсений Глова олтинчи, Анвар Маҳмудов саккизинчи ўринни банд этди.

OK-N классида Милена Полянская чемпионликни қўлга киритди. Ўзбекистонлик Амир Ҳамраев кумуш медалга сазовор бўлди. Александр Чубуринский эса учинчи ўринни эгаллади. Санжар Туреханов еттинчи, Николай Гирда тўққизинчи ва Камолиддин Нажмиддинов ўн биринчи ўриндан жой олди.

Mini классида эса Ўзбекистон вакили Ярослав Храмчихин барча рақибларини ортда қолдириб, чемпионлик шоҳсупасига кўтарилди. Иккинчи ўрин Элнура Ибрагимовага, учинчи ўрин Матвей Мазуринга насиб этди.

Мазкур натижалар ўзбекистонлик спортчиларнинг халқаро майдонда рақобатбардош эканини яна бир бор тасдиқлади.

Жавоҳир Тошхўжаев,

ЎзА