Ўзбекистондан бизнес-классдаги парвозлар учун Истанбул энг оммабоп йўналишга айланди
2026 йилнинг январидан октябрь ойига қадар Ўзбекистон аҳолисининг бизнес-классдаги парвозларга бўлган қизиқиши сезиларли даражада ортди. Ушбу тоифадаги чипталарга бўлган талаб ўтган йилнинг мос даврига нисбатан 41% га ошди ва талаб энг юқори бўлган йўналишлар сифатида Истанбул ҳамда Москва етакчилик қилди. Хитойнинг учта шаҳри энг харидоргир йўналишлар ўнталигидан жой олди
Бу маълумотлар Aviasales.uz қидирув хизматининг жорий йил 1 январидан 20 октябрига қадар ўтказган таҳлилларига асосланади. Тадқиқотлар нафақат бизнес-класс парвозларига бўлган талаб ўзгаришини, балки нархлар динамикасини ҳам кўрсатади.
Хусусан, бир томонга чипта нархи ўртача 1 255 долларни ташкил этиб, ўтган йилги кўрсаткичдан деярли 5% га юқорилади. Олмаотага парвозлар нархида энг юқори ўсиш даражаси кузатилди: нархлар 36% га ошиб, 578 долларни ташкил этди. Шу билан бирга, Куала-Лумпурга парвоз нархлари 39% га арзонлашиб, ўртача 989 долларни, Истанбулга 1 010, Москвага эса 1 206 долларни ташкил этди.
Умуман олганда, бизнес-классда парвоз қилиш саёҳатчиларга ўртача 4,2 баравар қимматга тушмоқда. Эконом-класс чиптасининг ўртача нархи 3,6 млн сўмни ташкил этади. Асосий фарқ йўналиш турига боғлиқ. Хусусан, Дубайга бизнес-классда учиш нархи эконом-классга нисбатан етти баравар қиммат бўлса, Москва йўналишида бу фарқ беш бараварни, Париж, Ханчжоу ва Куала-Лумпурда эса қарийб 2,5 бараварни ташкил қилади.
Энг юқори талаб Истанбул йўналишидаги парвозларда қайд этилди: бизнес-класс чипталарининг сотув ҳажми бир йилда 3,6 бараварга ошган. Барча харидларнинг чорак қисми айнан ушбу йўналишга тўғри келади. Москва шаҳрига бўлган талаб 11% га камайган.
Хитой ватандошларимиз учун визасиз режим жорий этгани ушбу мамлакатга бўлган қизиқиш ошишига хизмат қилган асосий омиллардан бири бўлди. Ўзбекистонликлар 2025 йилнинг 1 июнидан бошлаб 30 кунгача ушбу давлатда визасиз бўлишлари мумкин. Ўтган йил давомида Хитой шаҳарларига бўлган қизиқиш сезиларли даражада ортди. Янги авиаташувчиларнинг бозорга кириб келиши ҳисобига чипталар нархи арзонлашгани ва парвозлар географияси кенгайгани ҳам бунга туртки берди. Авваллари Хитойга асосан ишбилармонлик мақсадида ташриф буюрилган бўлса, эндиликда ушбу мамлакат оммабоп сайёҳлик йўналишига ҳам айланди.
Саёҳат давомийлиги бўйича бизнес-класс йўловчилари эконом-классни танлаган саёҳатчилардан деярли фарқ қилмайди ва бу кўрсаткич ўртача бир ҳафтани ташкил этади. Шу билан бирга, чипталарни брон қилишда ўзига хос жиҳатлар мавжуд. Бизнес-класс чипталари парвоздан ўртача 10 кун олдин харид қилинса, эконом-классдаги чипталар 12 кун олдин сотиб олинмоқда. Бундан ташқари, бизнес-класс йўловчилари кўпинча икки томонга чипталарни расмийлаштиради. Ушбу тоифадаги саёҳатчилар учун бундай харидлар 42% ни, эконом-класс йўловчилари учун эса 22% ни ташкил этади. Болалар билан парвоз қилиш ҳам бизнес-класс саёҳатчилари орасида 8% га кўпроқдир.
2026 йилда бизнес-классда харид қилинган энг қиммат чипта Тошкент – Майами йўналишига тўғри келиб, 87,3 млн сўмни ташкил этди. Чипта нархи бўйича тарихий рекорд 2023 йилда қайд этилган эди. Ўшанда Тошкентдан Лос-Анджелесга «Emirates» авиакомпанияси орқали учиш учун сотиб олинган чипта нархи 121,3 млн сўмни ташкил қилган.
Азиза Алимова, ЎзА
