Ўсимликлар карантини ва ҳимояси агентлигида йирик коррупцион схема фош этилди
Бош прокуратура ҳузуридаги Иқтисодий жиноятларга қарши курашиш департаменти ходимлари томонидан тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилди.
Тадбирда фуқаро Г.У. Ўсимликлар карантини ва ҳимояси агентлигида ишловчи танишлари орқали Туркиянинг “Y.T.” корхонасини хорижий экспортёр корхоналар реестрига киритиб бериш эвазига минг АҚШ долларини олган вақтда ашёвий далиллар билан ушланган.
Терговга қадар текширувда фуқаро Г.У. ва агентликнинг бош мутахассиси М.Г. ўзаро тил бириктириб, “S.S.” масъулияти чекланган жамиятига Россия Федерациясидан ёғоч ва Туркманистон Республикасидан помидор маҳсулотларини импорт қилишда импорт карантин рухсатномасини расмийлаштириб бериш эвазига 2,9 миллион сўмни фирибгарлик йўли билан қўлга киритгани аниқланган.
Бундан ташқари, фуқаро Г.У.нинг 2 та банк пластик картасига фуқаролардан Р2Р шаклида 10,9 миллиард сўм келиб тушган. Шундан атиги 1,6 миллиард сўмини тўловлар учун тўлаб, 6,1 миллиард сўмини нақдлаштириб, агентликнинг масъул ходимларига бергани ва қолган 3,1 миллиард сўмни ўз эҳтиёжлари учун ишлатиб юборгани аниқланган.
Агентлик ва унинг қуйи ташкилотлари ғазна ҳисоб рақамларига келиб тушган 91,7 миллиард сўм таҳлил қилинганда 14,9 миллиард сўмлик тўловлар 759 нафар фуқаронинг пластик карталари орқали амалга оширилиб, шундан 174 нафари агентлик тизими ходими ва 34 нафари уларнинг яқин қариндошлари экани аниқланган.
Н.Абдураимова, ЎзА
