Оғир атлетикачиларимиз жаҳон чемпионатида умумжамоада 3-ўринни эгаллади
Хитойнинг Нинбо шаҳрида оғир атлетика бўйича катталар ўртасида ўтказилган жаҳон чемпионатида Ўзбекистон терма жамоаси аъзолари 3 та олтин медаль билан кучли учликни банд этди.
Икки ҳафта давом этган жаҳон биринчилигида 150 дан зиёд давлатнинг 500 нафарга яқин оғир атлетикачилари “Лос-Анжелес-2028” Олимпиадасининг дастлабки рейтинг баллари ҳамда 16 та вазн тоифасидаги совринли ўринлар учун кураш олиб борди.
Шиддатли кечган дунё биринчилигида маҳоратли оғир атлетикачимиз Акбар Жўраев -110 килограмм вазн тоифасининг даст кўтариш машқида 198 килограмм натижа қайд этиб, жаҳон рекордини янгилагани ўзига хос воқелик бўлди. Силтаб кўтаришда 234 килограмм натижа кўрсатган спортчимиз икки курашда ҳам жаҳон рекордини янгилади.
Шунингдек, А.Жўраев, иккикураш якунларига кўра, 432 килограмм натижа билан яна бир жаҳон рекордини ўрнатдики, бу, ўзбек оғир атлетикасининг қудратини яна бир бор намойиш этди.
Жаҳон чемпионатида КХДР вакиллари 20 та олтин, 8 та кумуш, 6 та бронза, жами 34 та медаль билан умумжамоа ҳисобида пешқадамликка эришди.
17 та олтин, 10 та кумуш, 6 та бронзага эга чиққан Хитой жамоаси иккинчи ўринни эгаллади. 3 тадан олтин медалга эгалик қилган Ўзбекистон ва Болгария терма жамоалари кучли учликка якун ясади.
Тўлқин Рўзиев,
ЎзА
