Ободлик — тараққиёт мезони, поклик — юксак маданият тимсоли
Мамлакат тараққиётини фақат иқтисодий кўрсаткичлар ёки улкан қурилишлар билан ўлчаб бўлмайди. Унинг ҳақиқий қиёфаси аввало инсон яшайдиган маҳалласи, кўчаси, атроф-муҳитининг қай даражада обод ва озода эканида намоён бўлади. Чунки ободлик бор жойда файз бор, поклик бор жойда соғлом турмуш тарзи, юксак маданият ва эртанги кунга ишонч қарор топади.
Сўнгги йилларда Президентимиз раҳбарлигида юртимизда инсон қадрини юксалтириш, аҳоли учун муносиб ҳаёт шароитини яратиш, шаҳар ва қишлоқларнинг архитектура қиёфасини тубдан ўзгартириш ҳамда экологик барқарорликни таъминлаш давлат сиёсатининг устувор йўналишига айланди. "Янги Ўзбекистон" ғояси фақат янги бинолар барпо этиш эмас, балки инсон онгида поклик, тартиб-интизом, Ватанга меҳр ва яшаб турган ҳудудга дахлдорлик туйғусини қарор топтиришни ҳам англатади.
Давлатимиз мустақиллигининг 35 йиллиги арафасида 28 июлдан 6 сентябрга қадар республика бўйлаб ўтказилаётган “Долзарб 40 кунлик” экологик тадбирлари ана шу эзгу ғояларнинг ҳаётий ифодаси бўлмоқда. Бу ташаббус оддий ободонлаштириш тадбири эмас, балки ҳар бир маҳалла, ҳар бир кўча ва ҳар бир хонадонни умумий масъулият майдонига айлантираётган халқчил ҳаракатдир.
Бухоро вилоятида ҳам Президентимиз ташаббуси билан эълон қилинган “Маҳаллада ободлик ва меҳр-саховат ойлиги” ҳамда “Долзарб 40 кунлик” доирасида амалга оширилаётган ишлар юксак уюшқоқлик ва масъулият билан давом этмоқда. Бу жараёнда давлат идоралари, коммунал хизматлар, маҳалла институтлари, жамоат ташкилотлари ва кенг жамоатчиликнинг бир мақсад йўлида бирлашгани эътиборга молик.
Бухоро шаҳридаги “Янги Ўзбекистон боғи” ҳудудида ўтказилган саф йиғини ҳам ана шу саъй-ҳаракатларнинг мантиқий давоми бўлди. Унда вилоят ҳокими Ботир Зарипов, ҳуқуқни муҳофаза қилувчи идоралар, маҳалла тизими ва коммунал соҳалар раҳбарлари, масъул ташкилотлар ва жамоатчилик вакиллари иштирок этиб, ҳар бир ҳудудда амалга ошириладиган ишлар юзасидан аниқ вазифалар белгилаб берилди.
Энг муҳими, бугунги вазифалар фақат чиқинди йиғиш ёки кўчаларни супуриш билан чекланмайди. Бу — инсон учун муносиб яшаш муҳитини шакллантириш, экологик хавфсизликни таъминлаш, аҳоли саломатлигини муҳофаза қилиш, шаҳарсозлик маданиятини юксалтириш ва қонун устуворлигини таъминлашга қаратилган комплекс ёндашувдир. Шу боис ҳудудларда санитария ишлари билан бир қаторда дарахтларга агротехник ишлов бериш, ариқ ва зовурларни тозалаш, йўл ёқаларини тартибга келтириш, таъмирталаб деворларни тиклаш ҳамда ноқонуний қурилмаларни қонунчилик асосида бартараф этиш ишлари ҳам изчил амалга оширилмоқда.
Бундай кенг қамровли саъй-ҳаракатлар натижасида Бухоронинг маҳаллалари кун сайин ўзгармоқда. Озода кўчалар, тартибга келтирилган яшил ҳудудлар, покиза жамоат жойлари ва файзли муҳит нафақат шаҳар кўркини оширади, балки одамларнинг кайфияти, меҳнат унумдорлиги ва турмуш сифатига ҳам бевосита ижобий таъсир кўрсатади.
Бир жиҳатни алоҳида таъкидлаш жоиз. Президентимиз таъкидлаганидек, маҳалла — жамиятнинг мустаҳкам таянчи. Шу боис маҳаллани обод қилиш, унинг экологик ва санитария ҳолатини яхшилаш фақат давлат идораларининг эмас, балки ҳар бир фуқаронинг ҳам муқаддас бурчидир. Зеро, Ватанга муҳаббат аввало ўз уйи, ўз кўчаси ва ўз маҳалласига меҳр қўйишдан бошланади.
Бугун Бухорода кечаётган ободонлаштириш ишлари ана шу юксак ғоянинг амалий тасдиғидир. Бу ерда ҳар бир тозаланган кўча, ҳар бир оқланган дарахт, ҳар бир ободлашган ҳовли Янги Ўзбекистоннинг янги қиёфасини яратаётган меҳнатсевар инсонлар саъй-ҳаракатининг самарасидир.
“Долзарб 40 кунлик” ва “Маҳаллада ободлик ва меҳр-саховат ойлиги” доирасида амалга оширилаётган ишлар бир кунлик тадбир ёки мавсумий ҳашар эмас. Бу — мамлакатимизда шаклланаётган янги ҳаёт фалсафаси, юксак фуқаролик маданияти ва Ватан тақдирига дахлдорлик туйғусининг амалий кўринишидир. Бухоро вилоятидаги бу хайрли ишлар нафақат бошқа ҳудудлар учун ибрат мактаби бўлиб хизмат қилади, балки Янги Ўзбекистон тараққиётининг энг муҳим мезони — инсон учун муносиб ҳаёт муҳитини барпо этиш йўлидаги қатъий сиёсатнинг яна бир ёрқин ифодаси сифатида тарих саҳифаларига муҳрланади.
Зариф Комилов, ЎзА мухбири
