Нодирбек Ёқуббоев Анатолий Карпов турнирида қатнашмоқда

Бугун, 22 май куни Россия Федерацияси пойтахти Москвада шахмат бўйича Жаҳон чемпиони, кўплаб халқаро турнирлар ғолиби саналган Анатолий Карповнинг 75 ёшлик юбилейига бағишлаб ўтказилаётган турнирнинг 4 ва 5-турларида ҳамюртимиз Нодирбек Ёқуббоев россиялик Андрей Есипенко ва Даниил Дубов билан куч синашади.

Айтиш лозим, мукофот жамғармаси 3 миллион 700 минг рублдан иборат турнирда 8 нафар маҳоратли шахматчи иштирок этмоқда.

Тезкор шахмат бўйича ўтаётган мазкур турнирнинг илк турида Ёқуббоев қора доналарда россиялик гроссмейстер Эрнесто Инаркиевга имкониятни бой берган бўлса, 2-турда оқ доналарда Ян Непомняший билан муроса йўлини танлади. 3-турда эса қора доналарда озарбайжонлик Темур Ражабовни мағлуб этди.

Турнирда биринчи рақам остида таснифланган тажрибали гроссмейстер Эрнесто Инаркиев ортда қолган 3 та турда юз фоизлик натижа билан 3 очко жамғарган ҳолда етакчилик қилмоқда. Владислав Артемев 2,5 очко билан 2-ўринни банд этган бўлса, Ян Непомняший ва Нодирбек Ёқуббоев 1,5 очко билан кейинги поғоналарда ҳаракатланмоқда. Андрей Есипенко, Даниил Дубов, Александр Гришчук (барчаси Россиядан) ҳисобида 1 очко, озарбайжонлик Темур Ражабовда эса 0,5 очко мавжуд.

7 та турдан иборат турнирнинг сўнгги баҳслари 23 май куни бўлиб ўтади.

Т.Рўзиев,
ЎзА