Наманганда “Аякс” футбол академияси иш бошлади
Мустақиллигимизнинг ўттиз беш йиллиги байрами муносабати билан Наманган шаҳрининг Давлатобод туманида “Навбаҳор” клуби қошида “Аякс” клуби билан ҳамкорликда ташкил этилган футбол академияси тантанали равишда ўз фаолиятини бошлади.
Мамлакатимизда жисмоний тарбия ва спортни ривожлантириш борасида олиб борилаётган кенг қамровли ислоҳотлар жараёнида миллионлар ўйини – футболнинг оммавийлигини ошириш, бу борада зарур инфратузилмани шакллантиришга алоҳида эътибор қаратилмоқда.
Эътироф этиш даркор, Наманган ўзининг бой футбол анъаналари ва иқтидорли футболчилари билан мамлакатимизда алоҳида ўрин тутади. Вилоятнинг бош жамоаси – “Навбаҳор” бир бор мамлакат чемпионлиги ва суперкубок ҳамда уч бора кубокни қўлга киритган, миллий чемпионатларда мунтазам ўйнаётган клубларнинг бири ҳисобланади.
Президентимизнинг 2025 йил сентябрь ойида Наманганга ташрифи чоғида берилган топшириққа кўра, ўсиб келаётган ёш авлодни халқаро стандартлар асосида тайёрлаш мақсадида “Навбаҳор” профессионал клубига қарашли олий маҳорат футбол мактаби уч йил муддатга Нидерландиянинг дунёга машҳур “Аякс” клуби футбол академияси бошқарувига берилди. Натижада, Наманган вилояти спорт бошқармаси ҳамда Европа Чемпионлар лигасининг уч карра ғолиби, УЕФА кубоги соҳиби – Амстердамнинг “Аякс” футбол клуби ўртасида ҳамкорлик меморандуми имзоланди.
Маълумот ўрнида, 1900 йилда ташкил этилган "Аякс" дунёдаги энг машҳур академия ҳисобланади ва ўз тарбияланувчиларини Европанинг “ТОП” клубларига ўтказиш орқали ҳар йили ўртача 50-70 миллион евро даромад топади.
Ўзаро битимга асосан, клублар ўртасида қўшма ўсмирлар футбол академияси ташкил этилиб, наманганлик ёш футболчилар ва мураббийларни тайёрлаш бўйича “Аякс”нинг бошқарув модели жорий этилади.
Мазкур ҳамкорлик меморандумига асосан, Европа футбол академиясининг тажрибали мураббийлари, “скаут” ва методистларидан иборат мутахассислар гуруҳи Наманганда фаолият юритмоқда. Ушбу кадрлар вилоятдаги футбол инфратузилмаси ва шаҳар, туманларда ёшлар тайёрлаш тизими билан яқиндан танишди.
Нидерландиялик мутахассислар бошчилигида олиб борилган селекция ишлари натижасида кўплаб номзодлар орасидан техник тайёргарлиги, ўйин тафаккури, тезкор қарор қабул қилиш қобилияти ва жисмоний имкониятлари орқали алоҳида ажралиб турган ёш иқтидор эгалари саралаб олинди. Синовдан ўтган ёш футболчилар эндиликда кўҳна қитъалик мутахассислар ва малакали мураббийлар қўл остида машғулотларни бошлаб, Европа футболи тажрибаси асосида сабоқ олади.
Академиянинг очилиши вилоят спорт жамоатчилиги учун чинакам байрамга айланди. Тантанали маросимда Наманган вилояти ҳокимлиги, вилоят футбол ассоциацияси, “Навбаҳор” жамоаси мураббийлари ва етакчи футболчилари, футбол фахрийлари жамулжам бўлдилар.
Наманган вилояти ҳокими, сенатор Шавкат Абдураззоқов янги академия водий футболида янги иқтидорларни кашф этиш, уларни замонавий спорт талаблари асосида тарбиялаш ва келгусида Ўзбекистон футболи шарафини халқаро майдонларда муносиб ҳимоя қиладиган муносиб чарм тўп усталарини етиштиришда муҳим қадам бўлишини таъкидлади.
Сўнгги йилларда юртимизда, хусусан Наманганда футболга қаратилаётган эътибор ўз самарасини бераётгани, айниқса, яқинда бўлиб ўтган футбол бўйича XXXII жаҳон чемпионатида Ўзбекистон миллий терма жамоаси сафида “Навбаҳор” клуби аъзолари Ўткир Юсупов ва Русланбек Жиянов ҳам муносиб қатнашганлиги ифтихор билан тилга олинди.
Қайд этиш жоизки, давлатимиз раҳбарининг жорий йил июнь ойида вилоятга ташрифи чоғида 22 минг томошабинга мўлжалланган “Марказий” стадион ҳамда “Аякс” академиясига алоҳида эътибор қаратилди. Мамлакатимиз етакчисининг кўрсатмалари асосида ўйингоҳ майдони жаҳон стандартлари асосида янгиланиб, клуб учун замонавий шароитлар ҳозирланди.
– Юртингизга катта иштиёқ ва улкан режалар билан келганмиз. Наманганда футбол академиясининг очилиши биз учун келажакдаги янги лойиҳалар сари қўйилган илк қадам бўлди. Мақсадимиз истеъдодларга ўз орзуларига эришишлари учун кўпроқ имкониятлар бериш. Саралов жараёнларида наманганлик кўплаб иқтидор соҳибларини кўрганимиздан мамнунмиз, – дейди Нидерландининг “Аякс” клуби футбол академиясидан таклиф қилинган мураббий-мутахассис Раймонд Аттевелд. – Ўзбекистон Президенти билан учрашганимизда унинг мамлакати футболи, миллат келажаги учун нақадар эътиборли эканлиги яққол кўзга ташланди. У бизнинг юртингизда самарали фаолият юритишимиз учун ҳукумат томонидан қандай ёрдам кераклиги билан қизиқди. Мазкур мулоқотдан кейин, ишлашимиз ривожлана бошлади, имкониятлар кенгайди, кўплаб жараёнлар яхшиланди. Зеро, шахсан Президентнинг қўллаб-қувватлови фаолиятимиз самарадорлиги учун муҳим аҳамиятга эгадир. Қолаверса, Наманганда маҳаллий аҳолининг миллионлар ўйинига бўлган меҳри ва қизиқиши катта эканлиги ҳам ҳал қилувчи омиллардан саналади.
Хуллас, “Навбаҳор” ва “Аякс футбол клублари ҳамкорлигидаги янги академиянинг очилиши болалар ва ўсмирлар футболини қўллаб-қувватлаш ҳамда ёш иқтидорли футболчиларни кашф этишга хизмат қилиши шубҳасиз. Зотан, бу маскандан дунёнинг гигант клубларида ўйнайдиган, жаҳон чемпионатларида ўз маҳоратини намоён қилиб, Ўзбекистон байроғини баланд кўтарадиган кўплаб футболчилар етишиб чиқишига ишончимиз комил.
Оқилхон Дадабоев, ЎзА мухбири.
