Наманган – Витебск ўртасида ҳамкорлик кенгаяди
Сўнгги йилларда Ўзбекистон билан Беларусь ўртасидаги кўп қиррали муносабатлар сифат жиҳатидан янги босқичга чиқди. Айниқса, Президентимизнинг шу йил июль ойида Беларусь Республикасига амалга оширган расмий ташрифи икки томонлама муносабатларни стратегик шериклик даражасига кўтарди. Мазкур ташрифда икки давлат ўртасида ҳудудлараро ҳамкорлик алоқаларини янада ривожлантириш масаласига ҳам алоҳида эътибор қаратилди.
Наманган вилояти ҳокимлиги мутасаддилари, йирик ишлаб чиқарувчи бизнес доиралари вакилларидан иборат делегация ҳудудлараро алоқаларни кенгайтириш мақсадида Беларусь Республикасига ташриф буюрди.
Дастлабки манзил Витебск вилояти бўлиб, унда саноат ва тадбиркорлик соҳаларида ҳамкорлик масалалари муҳокамалар қилинди.
Витебск – Беларусиянинг шимолида жойлашган маъмурий ҳудуд ҳисобланиб, майдони тахминан 40,1 минг квадрат километрни ташкил этади. 21 тумандан иборат Витебск мамлакатнинг муҳим саноат, энергетика, қишлоқ хўжалиги ва логистика ҳудудларидан биридир. Айниқса, Новополоцк ва Полоцк атрофидаги саноат мажмуалари, Витебск ва Оршадаги ишлаб чиқариш корхоналари минтақанинг иқтисодий аҳамиятини оширади.
Делегация раҳбари – Наманган вилояти ҳокими, Ўзбекистон Олий Мажлиси Сенати аъзоси Шавкат Абдураззоқов ҳамда Витебск вилояти ижроия қўмитаси раиси Александр Рогожник ўртасидаги учрашувда икки вилоят ўртасида ҳар томонлама ҳамкорликни кучайтириш, тадбиркорлар ўртасидаги алоқаларни янада кенгайтириш масалалари кўриб чиқилди.
Делегация аъзолари хизмат сафари чоғида Витебск вилояти Орша туманида жойлашган “Бремино-Орша” махсус иқтисодий зонасига борди. 2019 йил 22 июнда фаолиятини бошлаган махсус иқтисодий зона қулай географик жойлашувга эга.
Ҳудуд мультимодал саноат-логистика мажмуаси ва халқаро “Орша” юк аэродромини ўз ичига олади. Асосан саноат маҳсулотларини қайта ишлаш, улгуржи савдо, электрон тижорат, логистика ва омбор хизматлари каби йўналишларга ихтисослашган.
Эътиборлиси, ушбу ҳудудда тадбиркорлик фаолиятини юритишга қулай шарт-шароитлар яратилган. Жумладан, махсус ҳуқуқий режим доирасида солиқ имтиёзлари ва божхона преференциялари тақдим этилади.
Танишувлар давомида логистика йўналишларини оптималлаштириш, мунтазам юк ташиш ҳажмини ошириш ва қўшма корхоналар ташкил этиш масалаларига эътибор қаратилмоқда.
Наманган вилояти делегациясининг Беларусь Республикасига амалий ташрифи давом этмоқда.
Оқилхон Дадабоев, ЎзА.
