МОХИ ва Туркия таҳлилий маркази ўртасида илмий ҳамкорлик йўлга қўйилмоқда
Пойтахтимиздаги Марказий Осиё халқаро институтида (МОХИ) Туркиянинг “AVIM” (Avrasya İncelemeleri Merkezi) Евроосиё тадқиқотлари таҳлилий маркази директори Алев Килич билан онлайн учрашув бўлиб ўтди.
Учрашув доирасида икки томонлама ҳамкорликнинг бугунги ҳолати ва истиқболлари, жумладан, қўшма тадбирларни ташкил этиш ҳамда илмий нашрларни тайёрлаш масалалари муҳокама қилинди.
МОХИ директори Жавлон Ваҳобов Ўзбекистон – Туркия муносабатларининг ижобий динамикасини, шунингдек, икки мамлакат ўртасидаги ҳар томонлама ҳамкорликни янада чуқурлаштириш учун қўшимча имкониятлар яратиб бераётган кўп томонлама минтақавий ҳамкорлик форматларининг тобора ортиб бораётган аҳамиятини таъкидлади.
Ўз навбатида, Алев Килич Туркия ва Ўзбекистон ўртасидаги икки томонлама муносабатларнинг барқарор ривожланиб бораётганини айтиб, икки ўлканинг тарихий ва маданий жиҳатдан яқин эканини қайд этди.
Шунингдек, учрашувда Ўзбекистон ва Туркиянинг “ақл марказлари” ўртасида ҳамкорликнинг самарали механизмларини шакллантириш муҳимлиги алоҳида тилга олинди.
Мулоқот якунида МОХИ ва “AVIM” ўртасида узоқ муддатли ҳамкорликни ривожлантиришга қаратилган ўзаро англашув меморандуми имзоланди. Ҳамкорликнинг асосий йўналишлари этиб қўшма конференциялар ва давра суҳбатларини ташкил этиш, давлатлараро, иқтисодий ҳамда маданий алоқаларга оид тадқиқотлар олиб бориш, шунингдек, қўшма нашрлар тайёрлаш белгиланди.
ЎзА
