Миллий тиббиёт марказида бир вақтнинг ўзида иккита жигар трансплантацияси амалиёти ўтказилмоқда
Мамлакатимиз соғлиқни сақлаш тизимида сўнгги йилларда амалга оширилаётган изчил ислоҳотлар натижасида энг мураккаб, юқори технологик жарроҳлик амалиётлари муваффақиятли йўлга қўйилмоқда. Айни пайтда Миллий тиббиёт марказида ноёб ва ўта мураккаб жараён кечмоқда.
Марказ матбуот хизматининг маълум қилишича, шифохонада бир вақтнинг ўзида, параллель равишда икки нафар оғир беморда жигар трансплантацияси амалиёти олиб борилмоқда.
Ушбу ўта масъулиятли амалиётлар тиббиёт фанлари доктори, тажрибали трансплантолог Жасур Собиров бошчилигидаги юқори малакали мултидисциплинар жамоа томонидан бажарилмоқда. Жарроҳлик амалиётининг бир вақтда ўтказилиши ўзбек тиббиётининг салоҳияти ва техник имкониятлари нечоғли юқори эканини кўрсатади.
Қувонарлиси, мазкур трансплантацияларда инсонийлик ва бағрикенгликнинг юксак намунаси намоён бўлмоқда. Тирик донорлик тамойили асосида ўтаётган ушбу амалиётда беморлардан бирига унинг турмуш ўртоғи, иккинчисига эса ўз тоғаси жигарининг бир қисмини бермоқда. Яқинларининг ҳаётини сақлаб қолиш учун чин дилдан қилинган ушбу фидокорлик нафақат юксак инсонпарварлик ифодаси, балки замонавий трансплантологиянинг мураккаб клиник ва ташкилий жараёнларини ҳам ўз ичига олади.
Мутахассисларнинг таъкидлашича, бир вақтнинг ўзида иккита жигар трансплантациясини муваффақиятли ташкил этиш ва бошқариш жуда катта куч ҳамда маҳорат талаб этади. Бу жараёнда юқори даражадаги жарроҳлик санъати билан бирга, анестезиологик таъминот, интенсив терапия, лаборантлик ва диагностика хизматларининг заргарона аниқликдаги узвий ҳамкорлиги ҳамда ҳар бир босқичнинг халқаро стандартлар асосида мувофиқлаштирилиши лозим. Марказ шифокорлари ушбу синовли жараённи юқори профессионал даражада уддаламоқда.
Доктор Жасур Собиров бошчилигидаги трансплантологлар жамоаси бу каби мураккаб операцияларни изчил йўлга қўйиш, тиббиётга инновацион ёндашувларни татбиқ этиш ва энг муҳими, умидсизликка тушган беморларга янги ҳаёт бахш этиш йўлида ўзларининг юксак салоҳиятларини яна бир бор намоён этмоқда.
Мураккаб амалиётларнинг Миллий тиббиёт марказида муваффақиятли йўлга қўйилгани мамлакатимизда трансплантология йўналиши жаҳон тиббиёти андозалари даражасида изчил ривожланиб бораётганининг яна бир амалий тасдиғидир.
Моҳигул Қосимова, ЎзА
