Мемлекет басшысы Нөкіс қаласындағы жаңарған көше бойымен серуендеді
Президент Шавкат Мирзиёев Қарақалпақстан Республикасына сапары барысында Нөкіс қаласындағы жаңарған көше бойымен серуендеді.
Қаланың «Ғарезсизлик», «С.Камалов» және «Ғ.Шеразиева» көшелерінде жүргізілген абаттандыру жұмыстарының нәтижесінде тұрғындар мен қала қонақтарына жайлы демалыс ортасы қалыптасып, сауда және ойын-сауық орындарының тәулік бойы жұмыс істеуіне жағдай жасалды.
Бұл жұмыстарға 2,2 миллиард сум бөлініп, көшелердің 2,5 шақырымдық бөлігі жөнделіп, инфрақұрылымы жаңартылды.
Жаяу жүргіншілер жолдары салынып, орындықтар мен қоқыс жәшіктері орнатылды. Аумақты түнгі уақытта жарықтандыру үшін күн панельдері арқылы жұмыс істейтін энергия үнемдейтін шамдар қойылды. Жаңбыр суын ағызу және су жиналуының алдын алу мақсатында 1,5 шақырымдық желі жаңадан салынып, қолданыстағы желілер жаңғыртылды.
Жасалған жағдайлар кәсіпкерлік белсенділіктің де жандануына ықпал етті. Аумақта 8 жаңа кәсіпкерлік субъектісі жұмысын бастаса, тағы 10-ы қызмет аясын кеңейтті. Нәтижесінде 75 жаңа жұмыс орны ашылды.
Мемлекет басшысы көше бойымен жүріп, тұрғындармен еркін пікір алмасты. Елімізде орнаған бейбітшілік ең қымбат құндылық екенін атап өтіп, жұртшылыққа ізгі тілегін білдірді.
