Мемлекет басшысы көлік инфрақұрылымын дамыту жобаларымен танысты
Президент Шавкат Мирзиёев көлік инфрақұрылымын дамыту бойынша тұсаукесермен танысты.
Көлік инфрақұрылымы экономиканың барлық саласын өзара байланыстырып, өңірлердің әлеуетін толық іске қосуда, халық пен бизнес үшін қолайлы жағдай қалыптастыруда айрықша маңызға ие. Осыған байланысты елде автокөлік жолдарын, авиация, логистика жүйесін және халықаралық көлік дәліздерін дамытуға ерекше назар аударылып келеді.
Таныстырылым барысында ең алдымен «Ташкент – Самарқанд» балама автожолының құрылысы қаралды. Ұзындығы 282 шақырым болатын жаңа магистраль Ташкент, Сырдария, Жызақ және Самарқанд облыстарын байланыстырады. Заманауи цемент-бетон жабындысымен салынатын жолдың әр бағытында үш жолақтан қарастырылып, көлік қозғалысының жылдамдығы сағатына 150 шақырымға дейін жетеді.
Жоба аясында 12 көлік айрығы, 60 тоннель өткелі, 91 көпір, 16 жол өткелі, 258 дренаж нысаны мен интеллектуалды көлік жүйесін енгізу қарастырылған. Сонымен қатар 12 терминал, жол бойындағы инфрақұрылым нысандары және салмақ өлшеу жүйесі салынады.
Жауапты тұлғаларға әлеуетті инвесторлармен келіссөздерді жеделдетіп, құрылыс жұмыстарын қысқа мерзімде бастау тапсырылды.
Өзбекстанда авиация саласында жаңа экожүйе қалыптастыру бағытында да ауқымды жұмыстар жүргізіліп жатыр.
Атап айтқанда, өңірлердегі 7 халықаралық әуежай заманауи талаптарға сай қайта жаңғыртылуда. «Мойнақ», «Қоқан», «Зомин», «Шахрисабз», «Сариосиё» және «Сух» аудандарында жаңа әуежайлар салынып, елдегі әуе айлақтарының саны 18-ге жетті.
Сонымен қатар Науаи халықаралық әуежайының қызметін жобалық басқару қағидаттары негізінде ұйымдастырып, оның коммерциялық дербестігін арттыру шаралары қолға алынған. Әуежайға жергілікті және шетелдік әуе компанияларымен жолаушы мен жүк тасымалы, транзиттік және техникалық қону мәселелері бойынша дербес келіссөздер жүргізіп, келісімшарттар жасау құқығы берілді.
2030 жылға қарай әуежайдағы рейстер санын 2,3 есеге арттырып, жылына 7 мыңға жеткізу жоспарланған. Сондай-ақ жолаушылар тасымалы көлемін 150 мың адамға, ал жүк тасымалын 45 мың тоннаға дейін ұлғайту көзделіп отыр. Бұдан бөлек, әуежай аумағында әуе кемелеріне техникалық және коммерциялық қызмет көрсететін «порто-франко» еркін аймағы құрылмақ.
Таныстырылым барысында «Жаңа Ташкент» халықаралық әуежайының құрылысы жобасы да қаралды.
Әуежай жылына 20 миллион жолаушыға қызмет көрсету мүмкіндігіне ие болады. Жолаушылар терминалының аумағы 208,4 мың шаршы метрді құрайды. Сонымен қатар 169 әуе кемесіне арналған тұрақ орны мен ұзындығы 4 шақырым болатын екі ұшу-қону жолағы салынады.
Қазіргі уақытқа дейін халықаралық қаржы институттарының талаптарына сәйкес экологиялық және әлеуметтік әсерді бағалау жұмыстары жүргізілген. Жоба аумағында каналдар, коллекторлар мен электр желілерін көшіру жұмыстары басталып, қазір жоба және мердігер ұйымдармен келіссөздер жалғасуда.
Азаматтық авиация кәсіпорындарын авиаотынмен қамтамасыз ету мәселесі де қаралды.
Қазіргі таңда әуежайлардағы жанармай құю кешендерінің жалпы сыйымдылығы 49 мың тоннаны құрайды. 2030 жылға дейін жергілікті авиаотын өндірісін жылына 600 мың тоннаға, ал сақтау қуатын 80 мың тоннаға дейін ұлғайту жоспарланған. Осыған байланысты Науаи, Әндіжан, Бұхара, Үргеніш және «Жаңа Ташкент» халықаралық әуежайларында жаңа сақтау кешендері салынады.
Жиында жанармай сақтау мен құю жүйесін кезең-кезеңімен халықаралық стандарттарға сәйкестендіру қажеттігі атап өтілді. Сонымен қатар жанармай құю кешендерін басқару үдерістерін биыл толық цифрландыру және әуежайлардағы технологиялық талаптардың сақталуына тұрақты мемлекеттік бақылау орнату белгіленді.
Мемлекет басшысы көлік инфрақұрылымын дамытуда жобалардың экономикалық тиімділігі, құрылыс сапасы, қауіпсіздік талаптары мен халыққа қолайлылығы негізгі басымдық болуы қажет екенін атап өтіп, жауапты тұлғаларға тиісті тапсырмалар берді.
