Мария Тимофеева Туркияда чемпион бўлди

Теннис бўйича Ўзбекистон терма жамоасининг учинчи рақамли теннисчиси Мария Тимофеева Туркиянинг Истанбул шаҳрида аёллар ўртасида ташкил этилган WTA125 таснифига кирувчи халқаро турнирда бош совринга эга чиқди.

Аниқроқ айтадиган бўлсак, мусобақанинг сўнгги ҳал қилувчи финал учрашувида Мария Тимофеева хорватиялик Донна Векичга қарши баҳс олиб борди. Икки сет давом этган учрашувда теннисчимиз 6:4, 6:2 ҳисобида ғалаба қозонган ҳолда мусобақа чемпионига айланди.

Мария учун ушбу муваффақият 15 минг 500 АҚШ доллари пул мукофоти билан бирга WTA рейтингининг 125 очкосини тақдим этди. Мусобақа вице-чемпиони бўлган Донна Векич эса 8 минг 400 АҚШ доллари ва 81 рейтинг очкосига эга чиқди.

Жавоҳир Тошхўжаев, ЎзА