Крикетчиларга спорт жиҳозлари тақдим этилди
Мамлакатимиз мустақиллигининг 35 йиллиги муносабати билан Ўзбекистон Республикаси Ташқи ишлар вазирлиги томонидан крикет бўйича мамлакатимиз терма жамоаси аъзоларига замонавий спорт анжомлари ва кийимлари тўплами тақдим этилди.
Олимпия спорт тури саналган крикетни юртимизда янада ривожлантиришга қаратилган мазкур ташаббус Ўзбекистон Республикаси Ташқи ишлар вазирлиги ҳамда Ўзбекистоннинг Покистон Ислом Республикасидаги элчихонаси ҳамкорлигида амалга оширилди.
Спорт жиҳозларини Ташқи ишлар вазирлигининг Халқаро гуманитар ташкилотлар бошқармаси бўлими бошлиғи Ғуломжон Примқулов Ўзбекистон крикет федерацияси раиси Азиз Михлиевга тантанали равишда топширди.
Таъкидлаш жоизки, бугунги кунда крикет ёзги Олимпия ўйинлари дастуридан ўрин олган бўлиб, дунёнинг 100 дан ортиқ мамлакатида кенг оммалашган спорт турларидан бири ҳисобланади.
Мустақиллигимизнинг 35 йиллиги арафасида совға қилинган ушбу спорт анжомлари мамлакатимизда крикетни янада ривожлантириш, спортчиларнинг машғулотларини самарали ташкил этиш ҳамда иқтидорли ёш крикетчиларни ҳар томонлама қўллаб-қувватлашга қаратилгани билан аҳамиятли.
Т.Рўзиев,
ЎзА
