"Saint Louis Rapid & Blitz 2026": Синдоров рапид йўналишида 2-ўринни эгаллади
АҚШнинг Сент-Луис шаҳрида 10 нафар гроссмейстер иштирокида ўтаётган “Saint Louis Rapid & Blitz 2026” турнирининг рапид йўналиши баҳслари якунланди.
Умумий мукофот жамғармаси 200 минг АҚШ долларидан иборат халқаро турнирнинг рапид мусобақаларининг сўнгги турларида ҳамюртимиз Жавоҳир Синдоров америкалик Леньер Домингес Перез, Авондер Лианг ва Уэсли Со билан куч синашди.
Ўтказилган учта партияда бир ғалаба ва икки дуранг қайд этди. Еттинчи турда Леньер Домингес, 9-турда Уэсли Со билан муроса йўлини танлаган Жавоҳир 8-турда Эвондер Лиангни таслим этди.
Рапид баҳслари сарҳисобига кўра, Синдоров, 11 очко билан 2-ўринни эгаллади. Ҳиндистонлик Рамешбабу Праггнанандҳа 12 очко билан пешқадамликка эришган бўлса, Уэсли Со 10 очко билан 3-ўринни банд этди.
Бугун, 5 август куни халқаро турнирнинг блиц баҳсларида 4 та тур ўйинлари бўлиб ўтади.
Мусобақанинг илк турида Жавоҳир қора доналарда америкалик Левон Аронян билан куч синашади.
Эслатиб ўтамиз, 6 августга қадар давом этадиган “Grand Chess Tour” сериясининг навбатдаги босқичи ҳисобланган ушбу турнирда 1-ўринни эгаллаган шахматчи 50 минг АҚШ долларини қўлга киритади.
Т. Рўзиев, ЎзА
