Жаҳон чемпионати: Гандболчи қизларимиз бугун Португалия жамоаси билан куч синашади
Руминияда гандбол бўйича 32 та U18 аёллар миллий терма жамоалари иштирокида ўтказилаётган жаҳон чемпионати баҳслари муросасиз ўйинларга бойлиги билан ажралиб турибди.
8 та гуруҳга бўлинган ҳолда ўтаётган жаҳон биринчилигида Ватанимиз шарафини ҳимоя қилаётган Ўзбекистон ёшлар терма жамоаси аъзолари “С” гуруҳда Испания, Германия, Гвинея терма жамоалари билан кечган гуруҳ босқич мусобақаларида дунёнинг гигант жамоалари Испания ва Германияга имкониятни бой берган бўлса, гвинеялик гандболчи қизлар билан 22:22 кўринишида дурангга эришди.
Гуруҳ босқич ўйинлари якунига кўра, Европа жамоалари 1-16-ўринлар учун ўтадиган саралаш ўйинларида 4 та гуруҳдаги мусобақаларда қатнашиш имконига эга чиқди.
Ўз гуруҳида 3 ва 4-ўринни банд этган Африка қитъасининг Гвения жамоаси ва Ўзбекистон 17-32 ўринлар учун кечадиган учрашувларда 2-гуруҳда Португалия ва Аргентина жамоалари билан майдонга тушадиган бўлди.
Бугун, 3 август куни Ўзбекистон U18 аёллар миллий терма жамоаси аъзолари Португалия билан, Гвения жамоаси эса Аргентина билан куч синашади.
Эртага, 4 август куни ҳамюртларимиз Аргентина, гвенияликлар португаллар билан рўбарў келади.
Жаҳон чемпионати 9 августга қадар давом этади.
Т.Рўзиев, ЎзА
