Италиялик фирибгар сохта амфитеатр қуриб, сайёҳларга экскурсиялар ташкиллаштирган
Италиянинг Виченца провинциясида сўнгги 20 йил давомида Франко Малоссо исмли шахс 2005 йилдаги кучли кўчкидан сўнг “топганини” даъво қилган Берик денгиз амфитеатри сайёҳлар учун машҳур тарихий маскан сифатида танилиб келинган.
Тарихий объект бўйлаб экскурсиялар таклиф қилинган буклетда амфитеатр тахминан милоддан аввалги IV-V асрларда қурилгани ва ўз вақтида бу ерга Юлий Цезарнинг шахсан ўзи ташриф буюргани таъкидланган.
Малоссо сайёҳларга 40 евродан турлар сотиб даромад олган. Бу турлар оммабоп бўлган. Берик денгиз амфитеатри ҳатто Европа Иттифоқи томонидан молиялаштириладиган расмий туристик қўлланма ва мобил иловага ҳам киритилган, деб ёзади агентлик.
Бироқ тарихни яхши биладиган одамлар бир номувофиқликка эътибор қаратишлари мумкин, Цезар амфитеатр қурилганидан деярли 400 йил аввал яшаган. Лекин бу ёлғон катта фирибгарликнинг кичик бир қисми холос. Аслида амфитеатрни Малоссонинг ўзи 2000 йиллар бошида қурган.
Полицияда “топилма”нинг ҳақиқий келиб чиқиши бўйича шубҳалар пайдо бўлгач, сунъий йўлдош суратлари таҳлил қилинди ва археологлар жалб этилди. Малоссо маҳаллий тепаликлардан бирини текислаб, у ерда сувалган блоклар ва фиберглассдан “антик” иншоот барпо этгани маълум бўлди.
Ушбу иш бўйича суриштирувлар 2016 йилдан бери олиб борилди ва энди суд фирибгар тадбиркорни ноқонуний қурилиш ва санъат асарларини сохталаштиргани учун 28 ойлик қамоқ жазосига ҳукм қилди. Шунингдек, эркак 3000 евро миқдорида жарима тўлаши керак. Минтақа ҳокимияти фирибгардан 560 минг евро товон пули олмоқчи.
ЎзА
