Илғор ва замонавий қишлоқ хўжалиги техникалари намойиш этилди
Андижон қишлоқ хўжалиги ва агротехнологиялар институтида «AgroTech Klaster» корхонаси ҳамда Agrobank ҳамкорлигида «Қишлоқ хўжалиги техникалари ярмаркаси – 2026» кўргазма-ярмаркаси ташкил этилди.
Қишлоқ хўжалигида қўлланилаётган замонавий техника ва технологияларни кенг жамоатчиликка намойиш этиш, фермер ва кластер хўжаликларини илғор техника воситалари ҳамда техник ечимлар билан яқиндан таништириш, шунингдек, таълим муассасалари, ишлаб чиқарувчилар, етказиб берувчилар ва амалиётчи мутахассислар ўртасидаги ҳамкорликни янада ривожлантириш мақсадида ташкил этилган ярмарка самарали ўтди.
Кўргазмада турли қувват ва вазифаларга мўлжалланган замонавий тракторлар, ғалла ўриш комбайнлари, экиш машиналари, тупроққа ишлов бериш агрегатлари, транспорт воситалари ҳамда бошқа қишлоқ хўжалиги техникалари, хусусан, LOVOL русумли тракторлар, замонавий экиш агрегатлари ҳамда йирик қувватли техникалар намойиш этилди.
Айниқса, тадбир Андижон қишлоқ хўжалиги ва агротехнологиялар институти талабалари учун катта амалий аҳамият касб этди. Институтнинг агроинженерия, қишлоқ хўжалигини механизациялаштириш, техник сервис ва турдош таълим йўналишларида таҳсил олаётган талабаларга замонавий техника воситалари билан яқиндан танишиш, уларнинг асосий механизмларини ўрганиш, ишлаб чиқарувчи ва соҳа мутахассислари билан мулоқот қилиш имконини берди.
Кўргазма давомида қишлоқ хўжалиги корхоналари, фермер хўжаликлари, кластер корхоналар ҳамда техника воситаларини етказиб берувчи ташкилотлар вакиллари ўзаро ҳамкорликни янада мустаҳкамлаш юзасидан фикрлашди.
Ушбу кўргазма замонавий қишлоқ хўжалиги ишлаб чиқаришини механизациялаштириш даражасини ошириш, ресурс тежамкор ва юқори унумли техникаларни амалиётга жорий этиш, меҳнат унумдорлигини ошириш ва маҳсулот таннархини камайтиришга, қолаверса, таълим – илм-фан – ишлаб чиқариш интеграциясини мустаҳкамлашга хизмат қилди.
Фахриддин Убайдуллаев,
ЎзА мухбири
