Ҳоким ўринбосари тадбиркордан пул талаб қилган вақтда ушланди
Давлат хавфсизлик хизматининг Наманган вилояти бўйича бошқармаси ҳамда Бош прокуратура ҳузуридаги Департамент ходимлари ҳамкорлигида ўтказилган тезкор тадбирда мансабдор шахснинг ноқонуний ҳаракатларига чек қўйилди.
Маълум қилинишича, Косонсой тумани ҳокими ўринбосари ҳокимият томонидан маҳаллий тадбиркорга ижара асосида ажратилган ер майдонини бошқа тадбиркорга олиб бериш билан таҳдид қилган. Ушбу важдан фойдаланган мансабдор шахс тадбиркордан ўзининг яшаш хонадонига 20 кВт қувватли қуёш панелларини ўрнатиб беришни талаб қилган.
Тезкор тадбир давомида ҳоким ўринбосари қуёш панелларини харид қилиш ва ўрнатиш харажатлари учун мўлжалланган 65 миллион сўм пул маблағини ўзининг хизмат автомашинасида олаётган вақтида ашёвий далиллар билан ушланган.
Ҳолат юзасидан тегишли тартибда ҳуқуқий баҳо бериш чоралари кўрилмоқда.
Ҳамроз Баёнов,
ЎзА
