Халқаро инвесторларнинг Ўзбекистонга ишончи ортмоқда (+видео)
Кеча пойтахтимиздаги “Hilton” меҳмонхонасида Ўзбекистон Миллий инвестиция жамғармаси (UzNIF) IPO жараёнлари ва унинг натижаларига бағишланган матбуот анжумани бўлиб ўтди.
Тадбирда маълум қилинишича, IPO доирасида қарийб 603,6 миллион АҚШ доллари жалб қилинган. Инвесторлар томонидан билдирилган умумий талаб эса 2,8 миллиард доллардан ошиб, буюртмалар тўрт баравардан кўпроқ ҳажмда шаклланган. Бу Ўзбекистон капитал бозори тарихидаги энг йирик битим сифатида қайд этилди.
Анжуманда Ўзбекистон иқтисодиёт ва молия вазири ўринбосари Хуршид Мустафоев, “Templeton Asset Management” бош ижрочи директори Манраж Сехон, “Templeton Global Investments”нинг Марказий Осиё бўйича раҳбари Мариус Дан ҳамда халқаро инвестиция компаниялари вакиллари иштирок этди.
[gallery-29541]
Спикерлар мазкур IPO мамлакатда амалга оширилаётган иқтисодий ислоҳотлар ва инвестицион муҳитга халқаро ишонч ортиб бораётганининг амалий кўрсаткичи эканини таъкидлади.
– Ўзбекистон жуда кучли иқтисодиёт ва ресурсларга эга ҳамда компанияларга узоқ муддатли истиқболда сармоя киритиш учун ўсиш имконини берадиган платформани тақдим эта олади, бу эса ҳамкорлик учун жуда муҳим, -деди “Templeton Asset Management” бош ижрочи директори Манраж Сехон.
Таъкидланишича, IPOнинг ички қисми доирасида 214,6 миллиард сўм ёки 17,7 миллион доллар маблағ жалб қилинди. Жараёнда 4 900 дан ортиқ чакана инвестор иштирок этган бўлиб, уларнинг аксарияти “Jett” инвестиция платформаси орқали қатнашган.
Маълумот учун: UzNIF 2024 йил август ойида давлатимиз раҳбари фармони асосида ташкил этилган. Ҳозирда жамғарма портфели қиймати 2,44 миллиард долларга баҳоланмоқда. Унинг таркибига энергетика, авиация, банк, суғурта, телекоммуникация ва транспорт соҳаларидаги 13 та стратегик корхона улушлари киритилган.
<iframe width="650" height="420" src="https://www.youtube.com/embed/vCadR04VNu4" title="Xalqaro investorlarning O`zbekistonga ishonchi ortmoqda " frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>М.Содиқов, Ф.Яхшибоева, Ф.Абдурасулов (сурат), Н.Абдувоитов (видео), ЎзА
