ГФР шаҳарларида тартибсизлик
Германиянинг бир неча йирик шаҳрида ёшлар иштирокида ўтказилган намойиш оммавий тартибсизлик билан якунланди. Турмуш қиймати ошиши ва бошқа ижтимоий муаммоларга қарши бошланган тинч акция кечга бориб Франкфурт, Берлин, Гамбург ва Кёльн шаҳарларида тўқнашувга айланди. Айрим иштирокчилар дўконлар ойнасини синдириб, савдо нуқталарини талон-тарож қилди, кўчаларда ёнғинли тўсиқлар ўрнатди.
Полиция тартибни тиклаш учун сув пуркагич машина ва махсус бўлинмаларни ишга солди. Берлинда қарийб 3 500 киши қатнашган намойишда 27 нафар полиция ходими енгил тан жароҳати олди, 60 га яқин одам қўлга олинди. Гамбургда эса 120 га яқин иштирокчи вақтинча ушланган.
Германия ички ишлар вазири Александр Добриндт тартибсизликда айрим сўл гуруҳлар ва қоидабузарларни айблаб, уларга нисбатан қатъий жазо чораси қўллашга чақирди. Қўзғолон ташкилотчилари эса зўравонлик ҳаракатига алоқадор эмаслигини билдирган. Айни пайт вазият нисбатан барқарорлашган бўлса-да, айрим шаҳарлар жиддий моддий зарар кўргани қайд этилган.
Мусулмон Зиё, ЎзА
