Ерларни ижарага олишда имтиёзлар жорий этилди
Мамлакатимизда кейинги йилларда фермер хўжаликларининг ҳуқуқий мақомини мустаҳкамлаш, ерни сотиб олиш, фойдаланиш, маҳсулот етиштириш ва сотишда уларга кенг имкониятлар яратиб берилмоқда. Қишлоқ хўжалигига мўлжалланган ерларни ажратишда шаффоф механизм жорий этилиб, фермерларга электрон аукцион орқали ерни эркин сотиб олиш имконияти ва ижара ҳуқуқини ҳимоя қилиш кафолати берилди. Бу ҳақда “Электрон онлайн-аукционларни ташкил этиш” АЖ Андижон вилояти ҳудудий вакили Жамшидбек Исроилов қуйидагиларни баён қилди.
– Президентимизнинг жорий йил 24-апрелдаги “Қишлоқ хўжалиги ишлаб чиқарувчиларининг ердан фойдаланишдаги мустақиллигини таъминлашга қаратилган навбатдаги чора-тадбирлар тўғрисида”ги фармони ана шу йўналишдаги ишларни самарали ташкил этишга хизмат қилади. Фармонга кўра, қишлоқ хўжалигига мўлжалланган ер участкаларини ижарага бериш бўйича тажриба-синов тариқасида бошланган янги тизимнинг ижобий натижаларидан келиб чиқиб, ушбу амалиётни республиканинг барча ҳудудларида татбиқ этиш орқали яхлит тизимни жорий қилиш белгиланди.
Эндиликда ердан фойдаланиш ихтисослиги олдиндан белгиланиб, электрон онлайн аукцион савдоларга чиқарилган ва узоқ даврдан бери сотилмай турган ер участкалари янги тизим асосида қайтадан аукцион савдоларга чиқарила бошланди.
Фармонга асосан шундай тартиб ўрнатилдики, 2026 йил 1-майдан бошлаб республиканинг барча ҳудудларидаги қишлоқ хўжалигига мўлжалланган ер участкалари Президентимизнинг 2025 йил 3-февралдаги “Қишлоқ хўжалиги экин майдонлари унумдорлигини ошириш, тармоққа инвестициялар жалб қилиш учун қулай шарт-шароит яратиш бўйича навбатдаги чора-тадбирлар тўғрисида”ги фармонида белгиланган тартибда реализация қилинади.
Бунда Қорақалпоғистон Республикаси Вазирлар Кенгаши Раиси ва вилоятлар ҳокимларининг таклифига асосан, 50 гектардан 500 гектаргача ўлчамдаги ер участкаларини фақат саноат усулидаги плантациялар ташкил қилиш ва чорвачилик учун ер участкасидан рухсат этилган фойдаланиш турини белгилаган ҳолда аукцион савдоларга чиқаришга йўл қўйилади.
Аукцион савдоларга чиқариладиган ер участкаларининг бошланғич нархи ер участкаси норматив қийматининг 50 фоизи миқдорида белгиланади. Ҳар бир такрорий савдода сотилмаган лот нархи 10 фоиздан босқичма-босқич бошланғич нархнинг 10 фоизи миқдорига (ер участкасини аукцион савдоларга чиқариш харажатларидан кам бўлмаган миқдорига) қадар пасайтирилади.
Биринчи аукцион савдоси тегишли ер участкаси ҳақидаги хабарнома эълон қилинган кундан бошлаб ўн беш кун муддатда ва такрорий савдолар бир кун муддатда ўтказилади.
Яйловлар, пичанзорлар ва лалми ер майдонлари аукцион савдоларига чиқарилганда лотнинг бошланғич нархи ер участкаси норматив қийматининг бир фоизи ҳамда ер участкасини аукционга чиқариш, ерларни фойдаланишга киритиш бўйича ер тузиш лойиҳаси ва техник-иқтисодий асосни ишлаб чиқиш харажатлари ҳамда ижара ҳуқуқини давлат рўйхатидан ўтказиш учун тўлов миқдорига тенг суммада белгиланади.
Ер участкаларини пахтачилик ва ғаллачилик ихтисослиги бўйича ижарага олган субъектлар жами ер участкасининг 50 фоиз қисмига нисбатан ижара ҳуқуқидан ихтиёрий равишда воз кечганда ер участкасининг ўзида қоладиган қисми учун янги тизимда белгиланган ҳуқуқлар, мажбуриятлар ва янгидан 49 йилга ижара ҳуқуқига эга бўлади.
Фахриддин Убайдуллаев ёзиб олди.
ЎзА мухбири.
