Экологик лойиҳалар учун 1 миллиарддан ортиқ грант ажратилди

Пойтахтимизда Ёшлар ишлари агентлиги томонидан “Яшил инновациялар” танловининг Республика босқичи доирасида ёшларнинг экологик лойиҳаларига бағишланган тадбир бўлиб ўтди.

Бугунги кунда глобал иқлим ўзгариши ва экологик муаммолар ечимида ёш авлоднинг инновацион ёндашуви ҳар қачонгидан ҳам муҳим аҳамият касб этмоқда. Шу боис мамлакатимизда ёш олимлар ва ихтирочиларнинг «яшил» ғояларини қўллаб-қувватлашга алоҳида эътибор қаратиляпти.

Бунинг ёрқин исботи сифатида, “Яшил ташаббуслар жамғармаси” ҳамда Ёшлар ишлари агентлиги ҳамкорлигида ташкил этилган “Яшил инновациялар” (Green Spark) кўрик-танловининг Республика босқичи якунланди.

Мазкур нуфузли беллашув юртимизнинг турли ҳудудларидан келган энг иқтидорли ёшларни бирлаштириб, атроф-муҳитни муҳофаза қилишга қаратилган энг истиқболли лойиҳаларни саралаб берди.

Финал босқичига йўл олган 87 та лойиҳа орасидан 24 та экологик лойиҳа жами 1 миллиард 140 миллион сўм грант билан қўллаб-қувватланди. Тақдимотлар давомида лойиҳаларни ривожлантириш, уларни амалиётга татбиқ этиш ва кейинги босқичларда қўллаб-қувватлаш бўйича экспертлардан тавсиялар олинди.

Форумнинг очилиш маросимида Ёшлар ишлари агентлиги директори Алишер Саъдуллаев иштирок этиб, финалчиларни табриклади. Шунингдек, давлат ташкилотлари, бизнес вакиллари, банклар, инвесторлар ва соҳа экспертлари иштирокида очиқ мулоқотлар ташкил этилди.

Гулноза Бобоева, ЎзА