Деҳлида 6 та метро бекати вақтинча ёпилди
Ҳиндистон пойтахти Деҳли шаҳрида мухолифат партиялари ва ёшлар ҳаракати томонидан ўтказилаётган оммавий норозилик намойишлари сабабли хавфсизлик чоралари кескин кучайтирилди.
Шу муносабат билан, шаҳардаги 6 та метро бекати вақтинча ёпилди, 20 дан ортиқ йўналишда транспорт ҳаракати чекланди.
Намойишчилар сайловчилар рўйхатининг қайта кўриб чиқилишига эътироз билдириб, Марказий сайлов комиссияси раҳбари Гьянеш Кумарнинг истеъфосини талаб қилмоқда.
Можарога ўтган йили бошланган сайловчилар рўйхатини текшириш жараёни сабаб бўлди. Жараён давомида 130 миллиондан ортиқ исм-шариф рўйхатдан чиқариб ташланган.
Расмий маълумотларга кўра, уларнинг 28 миллиони вафот этган, 63 миллиони кўчиб кетган, 30 миллионини эса топишнинг имкони бўлмаган. Бироқ мухолифат вакиллари бу жараён мамлакат бош вазири Нарендра Модининг “БДП” партияси манфаатларига хизмат қилаётгани, айниқса, мусулмонлар ҳамда бошқа миллий камчиликларга адолатсиз муносабатда бўлинганини таъкидламоқда.
Сайлов комиссияси ва ҳукмрон партия бу айбловларни рад этиб, хатолик билан ўчирилганлар қайта рўйхатдан ўтиши мумкинлигини билдирган.
Дам олиш кунлари полиция минглаб намойишчиларни қўлга олди. Шунингдек, асосий мухолиф партия бўлмиш “Конгресс” етакчиси Раҳул Ганди Олий суд томон юриш қилиш ва бош судьяга сайловлардаги қонунбузарликларни тўхтатиш бўйича мурожаатнома топширишни режалаштирган эди. Бироқ Олий суд раиси учрашув сўровини рад этиб, масала судда кўриб чиқилаётгани сабабли мурожаатни ҳуқуқий тартибда киритишни тавсия қилди.
Ёшлар ҳаракати пойтахт полициясидан тинч намойиш ўтказиш учун сана ажратишни талаб қилмоқда. Агар 24 соат ичида рухсат берилмаса, янги норозилик акциялари эълон қилиниши билдирилди.
Ф.Яхшибоева, ЎзА
