“Давлатимиз раҳбарининг биз билан учрашуви самарали ишлашимизга туртки берди” – Фарҳод Абдуллаев
Актёр фикри
Ўзлигимиздан ғурур, ютуқларимиздан куч олиб, ўз киноларимизни яратайлик… Бу сўзлар замирида ислоҳотни англаш, илм-маърифат билан жамиятга хизмат қилиш акс этади.
Давлатимиз раҳбари қайси соҳа вакиллари билан учрашмасин, маънавият масаласига оид ислоҳотларнинг аҳамиятига алоҳида эътибор қаратадилар.
Президент Шавкат Мирзиёев 26 октябрь куни “Ўзбекфильм” киностудиясига уйига ташриф буюриб, кинематография соҳаси ходимлари билан учрашди. Соҳада амалга оширилаётган ишлар ва келгуси режаларни муҳокама қилди.
– Касбимиз тақозоси билан премьералар, спектакллар туфайли доимо ҳаяжонда юрамиз. Лекин бугун сал бошқачароқ ҳаяжондаман, – деди Ўзбекистонда хизмат кўрсатган артист, Ўзбек Миллий академик драма театри актёри Фарҳод Абдуллаев. – Чунки ҳурматли Президентимизнинг биз, киночилар билан навбатдаги учрашувлари бўлиб ўтди. Давлатимиз раҳбарининг ишлари қанчалар кўп бўлмасин, биз, киночиларга яна бир бор вақт топганлари учун жуда-жуда миннатдормиз. Ҳозир учрашув ташкил этилган муҳташам бино – “Ренессанс” кино уйи, унинг ёнидаги “Ўзбекфильм” биноси бир пайтлар қандай аҳволда эди, ҳувуллаб, совиб ётар эди. Ана шуларнинг ҳаммасига Президентимиз ўзлари бош бўлиб, ечим топди, шароитлар яратиб бердилар. Биз шунга лаббай деб жавоб беришимиз керак, ишлашимиз керак, Президентимизнинг кўзларини қувонтиришимиз керак. Бу борада қандай ишлар қиламиз, қайси мавзуларда фильмлар олишимиз зарур, шулар ҳақида келишиб олдик. Эндиликда ҳаракатдамиз.
Бизнинг ёшимиз катта бўлиб қолди, ҳозир оилани, невараларни ўйлаймиз. Бугун невараларимизнинг эртанги куни учун ҳам хотиржаммиз. Шундай экан, масъулият ҳам жуда катта. Президентимизнинг кўнгилларидагидек меҳнат қилишимиз керак. Давлатимиз раҳбарининг биз билан учрашуви янада яхшироқ ишлашга туртки беради, куч беради.
ВИДЕОСИ ҚУЙИДА:
Абдулазиз РУСТАМОВ,
Ёқубжон МЕЛИБОЕВ (видео), ЎзА
